ბატონ ვოლსკის მინდა ვურჩიო, ევროპარლამენტარებზე უპასუხისმგებლო და არაკომპეტენტური განცხადებების გაკეთებამდე Google ან Wikipedia გამოიყენოს - აცხადებს "ლელოს" წარმომადგენელი გრიგოლ გეგელია გიორგი ვოლსკის განცხადებასთან დაკავშირებით, რომელიც მან ევროპარლამენტარების ერთობლივი განცხადების კომენტირებისას გააკეთა.
"ვოლსკის თურმე არ ჰგონებია, რომ 7 პარლამენტარის განცხადება იმოქმედებს საქართველო-ევროკავშირის სტრატეგიულ ურთიერთობებზე. ბატონ ვოლსკის მინდა ვურჩიო, ევროპარლამენტარებზე უპასუხისმგებლო და არაკომპეტენტური განცხადებების გაკეთებამდე Google ან Wikipedia გამოიყენოს. სამარცხვინო და კატასტროფულია, როდესაც 2021 წელს პარლამენტარად წოდებულმა ადამიანმა იმდენიც კი არ იცის, რომ ევროპარლამენტარები ცალობით არ ითვლება.
პირველ რიგში, ეს შვიდი ადამიანი წარმოადგენს ევროპული პარლამენტის ყველა დიდ ფრაქციას - EPP, S&D, Renew Europe, Greens. შესაბამისად, მათი ნება ასახავს სრულიად ევროპული პარლამენტის ნებას საქართველოს საკითხზე. მეორეც, სწორედ ამ შვიდი ადამიანის აზრი ქმნის ევროკავშირის პოლიტიკას საქართველოსა და რეგიონზე. დაბოლოს, ზუსტად ეს ჯგუფი წარმოადგენს ქართული დემოკრატიის ყველაზე დიდი ქომაგებსა და მეგობრებს ბრიუსელში.
თითებზე თვლას და თავის დამშვიდებას, ვოლსკის ურჩევნია შეიგნოს, რომ ამ უმნიშვნელოვანესი შვიდი ადამიანის გარდა, "ქართული ოცნება" იღებს იგივე გზავნილსვაშინგტონიდან, ევროპული საბჭოდან, ევროპული კომისიიდან. გასაგებია, რომ "ქართული ოცნების" ინტელექტი და ფანტაზია ვერასდროს ვერ სცდებოდა სკამების ცალობით თვლას, მაგრამ ხელისუფლებას მოუწევს გაიგოს, რომ საერთაშორისო პოლიტიკაში არ გაუვა იგივე ხრიკები, რითაც შინ ცდილობს ფონს გასვლას, რამაც საქართველო უფსკრულის პირას მიიყვანა", - აცხადებს გეგელია.
შეგახსენებთ, ვოლსკიმ განაცხადა, რომ არ ფიქრობს, რომ რომ ექვსი პარლამენტარის განცხადებამ რაიმე იმოქმედოს სტრატეგიულ მიმართულებაზე. ვოლსკი გულისხმობდა 7 ევროპარლამენტარის განცხადებას, სადაც ისინი საქართველოსთვის ფინანსური დახმარების შეჩერებაზე საუბრობენ.
