რუსული ვაქცინის შესყიდვის სკანდალის დონზე, სლოვაკეთის პრემიერ-მინისტრი იგორ მატოვიჩი გადადგება მთავრობის მეთაურის პოსტიდან და მის ადგილს ფინანსთა მოქმედი მინისტრი ედუარდ ჰეგერი დაიკავებს. მატოვიჩი კი ახალ მთავრობაში ფინანსთა მინისტრის თანამდებობას დასჯერდება.
ედუარდ ჰეგერმა, რომელიც იგორ მატოვიჩის თანაპარტიელია, განაცხადა, რომ მოლაპარაკებებს იწყებს მმართველ კოალიციაში შემავალ პარტიებთან. ამის შემდგომ ჰეგერი შეხვდება სლოვაკეთის პრეზიდენს ზუზანა ჩაპუტოვას, რომელიც უფლებამოსილია დანიშნოს პრემიერ-მინისტრი.
გასულ კვირას, იგორ მატოვიჩმა განაცხადა, რომ მზად არის თანამდებობის დასატოვებლად იმ პირობით, რომ მთავრობის კაბინეტის წევრად დარჩებოდა.
სლოვაკეთის კოალიციური მთავრობა, რომელიც დაახლოებით ერთი წელია ქვეყანას განაგებს, დაშლის პირას აღმოჩნდა მას შემდეგ, რაც პრემიერ-მინისტრმა მატოვიჩმა რუსული ვაქცინა Sputnik V კოალიციაში შემავალ პარტიებთან შეთანხმების გარეშე შეიძინა.
რუსული ვაქცინის შეძენის გამო 12 მარტს თანამდებობა დატოვა ჯანდაცვის მინისტრმა. მოგვიანებით, თანამდებობა დატოვა კიდევ ხუთმა მინისტრმა.
პრემიერ-მინისტრის გადაწყვეტილება რუსული ვაქცინის შეძენის შესახებ გააკრიტიკა სლოვაკეთის პრეზიდენტმა ზუზანა ჩაპუტოვამაც
სლოვაკეთმა რუსეთისგან ვაქცინის 2 მილიონი დოზა შეიძინა, საიდანაც 20 ათასი დოზა 1-ელ მარტს მიიღო. მიუხედავად ამისა, საზოგადოებრივი პროტესტის გამო, სლოვაკეთში რუსული პრეპარატით ვაქცინაცია არ დაწყებულა.
