სლოვაკეთი ევროკავშირის მეორე ქვეყანა გახდა უნგრეთის შემდეგ, რომელმაც რუსული ვაქცინა სპუტნიკ V შეიძინა.
სლოვაკეთის ჯანდაცვის სამინისტროს ინფორმაციით, ქვეყანამ რუსული ვაქცინის 2 მლნ დოზა შეიძინა.
ამ დროისთვის, რუსული ვაქცინა ევროპის მედიკამენტების სააგენტოს მიერ არ არის დამტკიცებული. თუმცა ის უკვე დაამტკიცა სლოვაკეთის ეროვნულმა რეგულატორმა.
სლოვაკეთის პრემიერ-მინისტრი იგორ მატოვიჩი დაესწრო აეროპორტში ვაქცინის პირველი დოზების მიღებას, საიდანაც ამცნო მოსახლეობას, რომ რუსული ვაქცინა საშუალებას მისცემს ქვეყანას, იმუნიზაციის პროგრამა 40%-ით დააჩქაროს.
სლოვაკური მედიის ცნობით, ქვეყანამ პირველ ეტაპზე 200 ათასი დოზა მიიღო, 800 ათასი დოზის მიღება დაგეგმილია მარტსა და აპრილში, ხოლო დარჩენილი მილიონი დოზა მაისსა და ივნისში.
რუსული ვაქცინის შეძენა კრიტიკის საგანი გახდა ქვეყანაში, რადგან როგორც იუწყებიან, რუსეთთან ვაქცინის შესყიდვაზე მოლაპარაკებების შესახებ არაფერი იყო ცნობილი საზოგადოებისთვის. პრემიერ-მინისტრმა ვაქცინის მიღების დღეს განაცხადა, რომ შეთანხმება 27 თებერვალს გაფორმდა.
ფოტო: AFP
