რუსეთის საგარეო საქმეთა სამინისტრომ შეერთებულ შტატებში რუსეთის ელჩი ანატოლი ანტონოვი მოსკოვში გაიწვია. ამის შესახებ საგარეო საქმეთა სამინისტროს ოფიციალურმა, წარმომადგენელმა მარია ზახაროვამ განაცხადა.
ზახაროვას განცხადებით, ელჩი გაიწვიეს, რათა გაიმართოს კონსულტაციები რუსეთისა და ამერიკის ურთიერთობების გასაანალიზებლად.
მარია ზახაროვას თქმით, რუსეთი მოწადინებულია, ამერიკასთან ურთიერთობების შეუქცევადი დეგრადაცია არ დაუშვას.
"ჩვენთვის მთავარია განვსაზღვროთ რთულ მდგომარეობაში მყოფი რუსეთ-ამერიკის ურთიერთობების გამოსწორების გზები, რომლებიც ვაშინგტონმა ბოლო წლებში ჩიხში შეიყვანა", - დასძენს ზახაროვა.
მოსკოვის ამ გადაწყვეტილებას წინ უსწრებდა აშშ-ის პრეზიდენტ ჯო ბაიდენის ინტერვიუ ტელეკომპანია ABC News-სთან, სადაც მან განაცხადა, რომ რუსეთს აშშ-ის საპრეზიდენტო არჩევნებში ჩარევის გამო საფასურის გადახდა მოუწევს.
ამავე ინტერვიუში, ჟურნალისტის მიერ დასმულ შეკითხვაზე, ფიქრობს თუ არა, რომ პუტინი მკვლელია, ბაიდენმა დადებითად უპასუხა.