დიდი ბრიტანეთი მიმდინარე კვირას გამოაქვეყნებს სტრატეგიულ დოკუმენტს, სადაც რუსეთს ყველაზე დიდ საფრთხედ დაასახელებს. ამის შესახებ გაზეთი Sunday Times-ი წერს.
გამოცემის ინფორმაციით, დოკუმენტში საუბარი იქნება უსაფრთხოების, თავდაცვისა და საგარეო პოლიტიკის საკითხების კომპლექსურ მიმოხილვაზე, რომელსაც ბრიტანეთის პრემიერ-მინისტრი ბორის ჯონსონი 16 მარტს წარადგენს.
გამოცემისვე ინფორმაციით, რუსეთიდან მომდინარე საფრთხეებს შორის დასახელებულია რუსეთის ფედერაციის ხშირი შეჭრა დიდი ბრიტანეთის საზღვაო და საჰაერო სივრცეებში, ასევე დისიდენტების მკვლელობა ბრიტანეთის მიწაზე.
ამავე დოკუმენტში ჩინეთი მოხსენიებულია, როგორც კონკურენტი. გამოცემის ცნობით, მიმოხილვაში წარმოდგენილია ხარჯების გაზრდა კიბერუსაფრთხოებაში, მოსკოვისა და პეკინის წინააღმდეგ დიდი ბრიტანეთის პოტენციალის გაფართოვების მიზნით.
გაზეთის წყაროს თქმით, დიდი ბრიტანეთისთვის ყველაზე მთავარი საფრთხე რუსეთისგან მომდინარეობს, ჩინეთი კი ამ მიმართულებით არ განიხილება.
"ჩინეთი კონკურენტია, რომელიც ცდილობს მოიპაროს ინტელექტუალური საკუთრება და საფრთხეს წარმოადგენს ეკონომიკური უსაფრთხოებისათვის, თუმცა ეს იგივე არ არის, რაც სოლსბერიში მოხდა", - განუცხადა გამოცემას წყარომ.
ამასთან, კიდევ ერთი წყარო აღნიშნავს, რომ რუსეთი მტრული ქვეყანაა, მაშინ როცა ჩინეთი გლობალური გამოწვევაა.
2018 წლის მარტში, ბრიტანეთის ქალაქ სოლსბერიში სერგეი სკრიპალი და მისი ქალიშვილი იულია, ქიმიური ნივთიერება "ნოვიჩოკით" მოწამლეს. ბრიტანეთის ხელისუფლებამ მომხდარში რუსეთი დაადანაშაულა.