ევროპის კავშირი სანქციებს ამზადებს მიანმარის სამხედრო ხუნტის წევრების მმართველობის ქვეშ მყოფი კომპანიებისთვის. სამხედრო ხუნტამ ხელისუფლება სამხედრო გზით თებერვლის დასაწყისში ჩაიგდო ხელში.
სააგენტო Reuters-ის ინფორმაციით, სანქცირების შესახებ გადაწყვეტილებას სავარაუდოდ 22 მარტს, ევროკავშირის წევრი ქვეყნების საგარეო საქმეთა მინისტრების შეხვედრაზე მიიღებენ.
შვედური ტექსტილის კონცენერნის H&M-ის მენეჯმენტმა განაცხადა, რომ ღრმად შეშფოთებულნი და შოკირებულნი არიან მიანმარში დემონსტრანტების წინააღმდეგ გამოყენებული ძალის გამო. მიანმარი ერთ-ერთია იმ ქვეყანათა შორის, სადაც ცნობილი ბრენდის სამოსი იკერება.
კომპანიის განცხადებით, მან შეაჩერა მიანმარში არსებული ქარხნებისთვის ახალი შეკვეთების გაცემა. H&M-ის ოფიციალური ვებგვერდის თანახმად, კომპანიას მიანმარის 45-მდე კომპანიასთან აქვს კონტრაქტი გაფორმებული.
მიანმარში სამხედრო გადატრიალების შემდეგ არ წყდება მოქალაქეთა მშვიდობიანი პროტესტი, რომლებიც ითხოვენ სამხედრო დიქტატურის დასრულებას და ქვეყანაში სამოქალაქო ხელისუფლების აღდგენას.
სამხედრო ხუნტა საკუთარი მოქალაქეების წინააღმდეგ სასტიკ ძალას იყენებს. გაეროს ადამიანის უფლებათა ოფისის თანახმად, ხუნტის ხელისუფლებაში მოსვლის დღიდან, უსაფრთხოების ძალების მიერ მოკლულია 60-ზე მეტი დემონსტრანტი, დაკავებულია 2000-მდე ადამიანი.
