შვეიცარიაში ჩატარებული რეფერენდუმის წინასწარი შედეგებით, მოსახლეობის უმრავლესობამ მხარი დაუჭირა ისეთი სამოსის აკრძალვას, რომელიც სახეს ფარავს, მათ შორის ნიქაბისა და ბურკის.

საჯარო ადგილებში სახის დამფარავის სამოსის აკრძალვას 51.2%-მა დაუჭირა მხარი, 48.8%-ის წინააღმდეგ.

რეფერენდუმის ინიციატივა ეკუთვნის შვეიცარიის სახალხო პარტიის (SVP) მემარჯვენე ფრთას, რომელიმაც თავისი წინასარეფერენდუმო კამპანია დააფუძნა ლოზუნგს "შეაჩერე ექსტრემიზმი".

აღსანიშნავია, რომ ოფიციალურ ინიციატივაში, ბურქა ან ნიქაბი არსად იყო ნახსენები და სახის დამფარავი ნებისმიერი სამოსის აკრძალვას მოითხოვდა, თუმცა საარჩევნო კამპანიისა და ლოზუნგების სულისკვეთების გათვალისწინებით, ეჭვი არავის შეჰპარვია, რომ იგი მიმართული იყო სწორედ ამ მუსლიმური სამოსელის წინააღმდეგ.

შვეიცარიის წამყვანმა მუსლიმთა გაერთიანებამ რეფერენდუმის შედეგებთან დაკავშირებით განაცხადა, რომ "ბნელი დღე დაუდგათ მუსლიმებს".

დღევანდელი დღე ხნის ძველი იარებს, კიდევ უფრო აფართოებს უთანასწორობას და მკაფიო სიგნალს აძლევს მუსლიმთა უმცირესობას მათი გარიყულობის თაობაზე", - განაცხადა მუსლიმთა ცენტრალურმა საბჭომ თავის განცხადებაში, სადაც აღნიშნულია, რომ გადაწყვეტილებას სასამართლოში გაასაჩივრებენ.

შვეიცარიის მთავრობა მკაცრად ეწინააღმდეგებოდა მემარჯვენეთა წამოყენებულ ინიციატივას და აცხადებდა, რომ სახელმწიფოს გადასაწყვეტი არ არის, თუ რითი შეიმოსებიან ქალები.

გერმანიის ლუცერნის უნივერსიტეტის კვლევის თანახმად, შვეიცარიაში ბურკას თითქმის არავინ ატარებს, ნიქაბს კი მხოლოდ ქალების 30% ატარებს. შვეიცარიის 8.6-მილიონიანი მოსახლეობის დაახლოებით 5% მუსლიმია, რომელთა უმეტესობა თურქეთიდან, ბოსნიიდან და კოსოვოდან არის წარმოშობით.

შვეიცარიაში პირდაპირი დემოკრატია მოქმედებს, სადაც მოქალაქეებს რეგულარულად ეძლევად საშუალება, სხვადასხვა საკითხის გადასაწყვეტად რეგიონულ და ეროვნულ რეფერენდუმებში მიიღონ მონაწილეობა.

ბურქა/ბურკა არის მუსლიმანი ქალების სამოსი, რომელიც მთლიანად ფარავს სხეულს, თავსა და სახეს.

ნიქაბი/ნიყაბი ხშირად ერევათ ბურქაში. თუმცა მათ შორის დიდი განსხვავებაა, ნიქაბი ფარავს მთელ სახეს, გარდა თვალებისა, ბურქა კი მთელ სახეს ფარავს, თვალების ჩათვლით.