ბელარუსის გენერალურმა პროკურატურამ ოპოზიციის ლიდერის სვიატლანა ციხანოუსკაიას ექსტრადიციის მოთხოვნით, ლიეტუვის გენერალურ პროკურატურას მიმართა.
ბელარუსის საგამოძიებო უწყება ლიეტუვას შეახსენებს ორ ქვეყანას შორის არსებულ ექსტრადირების შესახებ ხელშეკრულებით ნაკისრ ვალდებულებებს და მოითხოვს ციხანოუსკაიას გადაცემას.
მინსკი ციხანოუსკაიასა და მის 4 თანამოაზრეს ძალაუფლების ხელში ჩაგდების მიზნით მასობრივი არეულობის მომზადებაში ადანაშაულებს.
აშკარაა, რომ ლიეტუვა არ აპირებს ბელარუსის რეჟიმისთვის ციხანოუსკაიას გადაცემას. ლიეტუვის საგარეო საქმეთა მინსიტრის გაბრიელიუს ლანდსბერგისის განცხადებით, ვილნიუსი არც კი განიხილავს ამ შესაძლებლობას.
"უმალ ჯოჯოხეთი გაიყინება ვიდრე ბელარუსის რეჟიმის მოთხოვნას განვიხილავთ", - განაცხადა ლანდსბერგისმა.
ალიაქსანდრ ლუკაშენკას საპრეზიდენტო არჩევნებში გამარჯვებულად გამოცხადების შემდეგ, ბელარუსში დაწყებული მასობრივი საპროტესტო აქციების შედეგად, ათასობით ადამიანი დაშავდა, დააპატიმრეს და დააკავეს, მათ შორის ათობით ჟურნალისტი. ცხრა ადამიანი დაიღუპა
პრეზიდენტობის ყოფილი კანდიდატი სვიატლანა ციხანოუსკაია არჩევნების შემდეგ იძულებული გახდა ქვეყანა დაეტოვებინა. იგი აქტიურად უჭერს მხარს ბელარუსში მიმდინარე საპროტესტო მოძრაობას და ლუკაშენკას რეჟიმზე ზეწოლის გასაძლიერებლად შეხვედრებს მართავს დასავლეთს ქვეყნების ლიდერებთან.