გერმანიამ შეცვალა თავისი უწინდელი პოზიცია ასტრაზენეკას ვაქცინასთან დაკავშირებით და 65 წელს გადაცილებული ადამიანებისთვის გამოყენების ნებართვა გამოსცა. ამის შესახებ კანცლერმა ანგელა მერკელმა განაცხადა.
მანამდე გერმანიამ ასტრაზენეკა მხოლოდ 65 წლამდე ადამიანებისთვის დაამტკიცა იმ მოტივით, რომ არასაკმარისი მონაცემები არსებობდა ხანდაზმულ ადამიანებზე მისი გავლენის შესახებ.
მაშინ ამ გადაწყვეტილებამ ასტრაზენეკას ვაქცინის ეფექტურობის შესახებ საზოგადოებაში სკეპტიციზმი გააღვივა იმდენად, რომ ზოგიერთი გერმანელი უარს აცხადებდა მის გაკეთებაზე.
ანგელა მერკელის განცხადებით, ბოლოდროინდელმა გამოკვლევებმა ცხადჰყო, რომ ვაქცინა 65 წელს გადაცილებული ადამიანებისთვისაც უსაფრთხოა.
სხვადასხვა კვლევების თანახმად, ასტრაზენეკას ვაქცინა ძალიან მაღალ ეფექტურობას აჩვენებს ხანდაზმულ ადამიანებში.
გერმანიაში ამ დროისთვის მოსახლეობის 5%-მა მიიღო ვაქცინის პირველი დოზა.
ევროკავშირის სამედიცინო მარეგულირებელმა ორგანომ ასტრაზენეკას ვაქცინა ყველა ასაკობრივი ჯგუფისთვის იანვარში დაამტკიცა. მიუხედავად ამისა, ევროკავშირის ზოგიერთმა ქვეყანამ, მათ შორის გერმანიამ, საფრანგეთმა, იტალიამ და ბელგიამ არ გასცეს რეკომენდაცია ვაქცინის 65 წელს გადაცილებული ადამიანებისთვის გამოყენებაზე.
