ინფორმაციამ ესპანეთის მეფის ფელიპე VI-ის დების ვაქცინაციის შესახებ ქვეყანაში მღელვარება გამოიწვია.
მედიაში გავრცელებული ინფორმაციით, 57 წლის პრინცესა ელენა და 55 წლის პრინცესა კრისტინა არაბთა გაერთიანებულ საამიროებში აიცრნენ, როდესაც ისინი მამას, ხუან კარლოსს სტუმრობდნენ.
ყოფილმა მონარქმა, ხუან კარლოსმა ფინანსური სკანდალის ფონზე გასულ წელს დატოვა ესპანეთი და არაბეთა გაერთიანებულ საამიროებში გადავიდა საცხოვრებლად.
ორივე პრინცესამ, რომელთაც ესპანეთის ვაქცინაციის გეგმის მიხედვით, ჯერ არ უწევდათ აცრა, თავიანთი გადაწყვეტილება განცხადებით განმარტეს.
"მე და ჩემი და ჩვენი მამის მოსანახულებლად წავედით არაბეთის გაერთიანებულ სამეიროებში, სადაც იმისათვის, რომ მოგვეპოვებინა სამედიცინო ცნობა, რაც საშუალებას მოგვცემდა მასთან მუდმივად ვიზიტს, შემოგვთავაზეს ვაქცინაცია, რაზეც უარი არ გვითქვამს", - ნათქვამია ერთობლივ განცხადებაში, რომელიც გამოცემა El Mundo-ში გამოქვეყნდა.
"რომ არა ეს გარემოებები, ესპანეთში დაველოდებოდით ვაქცინაციის რიგს", - დასძენენ პრინცესები.
პრინცესების ვაქცინაციის შესახებ გავრცელებული ცნობა კრიტიკის საგანი გახდა როგორც მოქალაქეებს, ასევე პოლიტიკოსებს შორის.
თანასწორობის მინისტრი ირენე მონტერო ერთ-ერთი პირველი იყო, ვინც გააკრიტიკა პრინცესა ელენა და პრინცესა კრისტინა.
"პრინცესების ვაქცინაციის შესახებ გავრცელებული ინფორმაცია ხელს უწყობს მონარქიის დისკრედიტაციას. საზოგადოებაში ეს აღიქმება როგორც განსაკუთრებული მოპყრობა და პრივილეგია", - განაცხადა მონტერომ.
შრომის მინისტრმა იოლანდა დიასმა ფაქტს უაღრესად უსიამოვნო და საძაგელი უწოდა.
ესპანეთის სამეფო ოჯახმა უარი თქვა კომენტარის გაკეთებაზე, რადგან პრინცესები ფორმალურად არ არიან სამეფო ოჯახის წევრები, მაგრამ განაცხადეს, რომ მეფე ფელიპე მე-6, დედოფალი ლეტიცია და მათ ქალიშვილები ვაქცინას მაშინ გაიკეთებენ, როდესაც მათ დრო მოვა.
ესპანეთში ამ დროისთვის მხოლოდ 4 მილიონი ვაქცინის დოზა გაკეთდა. პრიორიტეტულ ჯგუფში 80 წელს გადაცილებული ადამიანები და პანდემიასთან ბრძოლის წინა ხაზზე მომუშავენი არიან.