ევროპული საბჭოს პრეზიდენტი შარლ მიშელი გორის მუნიციპალიტეტის სოფელ ხურვალეთში, საოკუპაციო ხაზთან იმყოფებოდა. შარლ მიშელმა მედიასთან საუბრისას განაცხადა, რომ მისთვის მნიშვნელოვანი იყო, თავად ენახა საოკუპაციო ხაზთან არსებული სიტუაცია.
ევროპული საბჭოს პრეზიდენტის განცხადებით, ევროკავშირი საქართველოს სუვერენიტეტის და ტერიტორიული მთლიანობის ერთგულია.
"ჩემთვის ძალიან მნიშვნელოვანია, ჩემი თვალით მენახა ადგილზე არსებული ვითარება. სწორედ ამიტომ ვარ აქ. თქვენ იცით, რომ ევროკავშირი საქართველოს სუვერენიტეტის და ტერიტორიული მთლიანობის ერთგულია. ასევე, ძალიან მნიშვნელოვანია ევროკავშირის სადამკვირვებლო მისიის როლი, რათა შეძლებისდაგვარად, მაქსიმალურად ეცადოს სტაბილურობის შენარჩუნებას, ასევე წაახალისოს ნდობის აღდგენის ზომები. ვიცით, რომ სიტუაცია კომპლექსური და რთულია ადგილობრივი მოსახლეობისთვის. სწორედ ამიტომ ჩემთვის მნიშვნელოვანია, ვუთხრა ადგილობრივ მოსახლეობას – თქვენ მარტო არ ხართ. ევროკავშირი მშვიდობის, სტაბილურობის და უსაფრთხოების ერთგულია", - აღნიშნა მიშელმა.
შარლ მიშელი საქართველოს 28 თებერვალს ეწვია. ოფიციალური ვიზიტის ფარგლებში ის შეხვდა საქართველოს პრეზიდენტ სალომე ზურაბიშვილსა და პრემიერ-მინისტრ ირაკლი ღარიბაშვილს. ამ წუთებში, შარლ მიშელი ოპოზიციური პარტიების ლიდერებს ხვდება.
