აშშ-ის პრეზიდენტმა ჯო ბაიდენმა განაცხადა, რომ შეერთებული შტატები ყირიმს რუსეთის ნაწილად არასდროს აღიარებს.
ბაიდენის თქმით, ვაშინგტონი გააგრძელებს მუშაობას, რათა უკრაინაში განხორციელებული აგრესიის გამო რუსეთის პასუხისმგებლობა დაეკისროს.
"ამ სევდიან წლისთავზე ჩვენ ვიმეორებთ მარტივ ჭეშმარიტებას: ყირიმი უკრაინაა. აშშ არასდროს აღიარებს ყირიმს რუსეთის ნაწილად, უკრაინასთან ერთად წინ აღვუდგებით რუსეთის აგრესიულ ქმედებებს. გავაგრძელებთ მუშაობას იმისათვის, რომ რუსეთმა პასუხი აგოს უკრაინაში ჩადენილი უკანონობასა და აგრესიისთვის", - აღნიშნულია განცხადებაში.
ჯო ბაიდენი ამ განცხადებით რუსეთის მიერ ყირიმის ანექსიის მეშვიდე წლისთავს გამოეხმაურა.
უკრაინის კუთვნილი ყირიმის ნახევარკუნძული რუსეთის მიერ ანექსირებულ იქნა 2014 წლის 18 მარტს.
ანექსიას წინ უძღოდა ყირიმის ნახევარკუნძულზე რუსეთის შეიარაღებული ძალების ინტერვენცია და ოკუპაცია.
უკრაინაში 26 თებერვალს აღინიშნება "ყირიმის ოკუპაციის წინააღმდეგობის დღე". სწორედ 2014 წლის 26 თებერვალს პრორუსმა დემონსტრანტებმა გადაკეტეს პარლამენტი და მოითხოვეს რეფერენდუმი ყირიმის დამოუკიდებლობის თაობაზე. მომდევნო დღეებში რუსეთის მიერ მხარდაჭერილმა სეპარატისტებმა დაიკავეს აეროპორტები და ადმინისტრაციული შენობები.
2014 წლის 1-ელ მარტს რუსეთის ფედერაციის საბჭომ თანხმობა მისცა პრეზიდენტ პუტინს უკრაინაში შეიარაღებული ნაწილების შეყვანაზე რუსული ინტერესების დაცვის მიზნით, სიტუაციის სტაბილიზაციამდე. 11 მარტს მარიონეტულმა ყირიმის უმაღლესი საბჭოსა და სევასტოპოლის საქალაქო საბჭოს მიერ მიღებულ იქნა ერთობლივი რეზოლუცია, რითიც მათ ყირიმის დამოუკიდებლობა გამოაცხადეს.
16 მარტს პრორუსი სეპარატისტების ორგანიზებით ჩატარდა რეფერენდუმი - ხმის მიმცემთა დაახლოებით 96%-მა ყირიმის რუსეთის შემადგენლობაში შესვლას დაუჭირა მხარი. რეფერენდუმი და, შესაბამისად, მისი შედეგები ლეგიტიმურად არ ცნო გაერომ, ევროკავშირმა და საერთაშორისო საზოგადოებამ.
2014 წლის 18 მარტს ანექსირებული ყირიმი სევასტოპოლთან ერთად რუსეთის ფედერაციის შემადგენლობაში დე ფაქტოდ შევიდა.