საქართველოს ეკონომიკისა და მდგრადი განვითარების მინისტრის, ნათია თურნავას განცხადებით, წინასწარი პროგნოზით, ქვეყნის ეკონომიკა შემცირდება დაახლოებით ექვსი პროცენტით, რაც არის "იმაზე მძიმე შედეგი, ვიდრე თავიდან ვპროგნოზირებდით".
თურნავას თქმით, მიუხედავად ამისა, არსებობს ყველა წინაპირობა იმისა, რომ 2021 წელი იქნება აღდგენის, ზრდისა და გაჯანსაღების წელი.
"ქვეყნდება 2020 წლის ეკონომიკური ზრდის წინასწარი პროგნოზი. სამწუხაროდ, როგორც მოსალოდნელი იყო და როგორც მთელ მსოფლიოში ხდება, ნეგატიურ ზრდაზე გვაქვს საუბარი. ქვეყნის ეკონომიკა წინასწარი პროგნოზით, შემცირდება დაახლოებით 6 პროცენტით. ეს არის საკმაოდ მძიმე მაჩვენებელი, თუმცა ეს არის მსოფლიო ტრენდის ნაწილი. იცით, რომ გვქონდა გარკვეული სერიოზული გაჯანსაღება, რომელიც სხვა ქვეყნების ფონზე საკმაოდ მნიშვნელოვანი პოზიტიური სიგნალი იყო სექტემბერში, ოქტომბრის დასაწყისში, მაგრამ ბოლო კვარტლის ვითარებამ და მეორე ტალღამ ძალიან საქართველოს ეკონომიკას თავისი დაღი დაასვა, ისევე როგორც ჩვენს რეგიონს, ევროკავშირს.
საბოლოო ჯამში, შედეგი არის იმაზე მძიმე, ვიდრე თავიდან ვპროგნოზირებდით. ეს არის ეპიდემიის ზეგავლენა. აქედან გამომდინარე, მთავრობის გეგმაზომიერი ნაბიჯები, საკოორდინაციო საბჭოს გადაწყვეტილებები იმასთან დაკავშირებით, რომ ნოემბრის ბოლოს მივიღეთ პრევენციული ზომები, წერტილოვანი შეზღუდვები დავაწესეთ, იყო აბსოლუტურად ადეკვატური.
თავადაც ხედავთ, რომ ეკონომიკაში ვითარება არცთუ ისე სახარბიელო გვაქვს, თუმცა გამომდინარე საერთაშორისო ტრენდებიდან, ექსპერტების და ორგანიზაციების პროგნოზებიდან, რაც შეეხება 2021 წლის გლობალურ ეკონომიკას, მეტი ოპტიმიზმის შესაძლებლობაა. ეს ყველაფერი ვაქცინაციის მოლოდინის ფონზე უფრო დადებითი გახდა. ჩვენ გვაქვს ყველა წანამძღვარი და წინაპირობა იმისა, რომ 2021 წელი იყოს ზრდის და ეკონომიკური აღდგენის წელი. მსოფლიო ბანკის, საერთაშორისო სავალუტო ფონდის, სხვა ჩვენი მეგობარი საერთაშორისო ორგანიზაციები თანხმდებიან, რომ საქართველო კვლავაც შეინარჩუნებს რეგიონის ეკონომიკური ზრდის ლიდერის პოზიციას, 5 პროცენტზე მეტი საშუალო ეკონომიკური ზრდით", - თქვა თურნავამ.
