ეკონომიკა მთლიანობაში გახსნილი გვაქვს. ამის შესახებ ეკონომიკისა და მდგრადი განვითარების მინისტრმა, ნათია თურნავამ მთავრობის ადმინისტრაციაში ეკონომიკურ გუნდს, ეპიდემიოლოგებსა და ბიზნესის წარმომადგენლებს შორის გამართულ შეხვედრაზე განაცხადა.
"ეკონომიკა მთლიანობაში გახსნილი გვაქვს, არ შეგვიზღუდავს არც მრეწველობა, არც სასურსათო ვაჭრობა, არც სოფლის მეურნეობა, არც მომპოვებელი და გადამამუშავებელი მრეწველობა, მაგრამ საუბარია იმ სფეროებზე, რომლებიც მსოფლიოში მაღალი რისკის მატარებლად არიან მიჩნეული და იმათაც ეხლა ვხსნით", - აღნიშნა ნათია თურნავამ ბიზნესთან შეხვედრის დასრულების შემდეგ.
მისივე თქმით, ასევე დადებითია ის ფაქტი, რომ 1-ლი თებერვლიდან იხსნება ფრენები და საერთოდ უქმდება ნებისმიერი შეზღუდვა რეგულარულ ფრენებზე.
"მიმდინარე კვირაში რამდენიმე შეხვედრაა დაგეგმილი, მათ შორის ტუროპერატორებთან, თუ როგორ ვიმუშაოთ ვაქცინირებულ ტურისტებზე, რადგან ჩვენს რეგიონში ძალიან ბევრი ქვეყანაა, სადაც ვაქცინაციაგავლილ ადამიანებს საქართველოში ჩამოსვლა უნდათ და ჩვენ ამაშიც დავეხმარებით", - დასძინა ეკონომიკისა და მდგრადი განვითარების მინისტრმა.