შეერთებული შტატების 46-ე პრეზიდენტის, ჯო ბაიდენის ადმინისტრაციამ განაცხადა, რომ შეეცდებიან დააჩქარონ 20-დოლარიან კუპიურაზე, აფროამერიკელი აქტივისტის, მონობის წინააღმდეგ მებრძოლის ჰარიეტ ტაბმენის გამოსახვის პროცესი.
20-დოლარიან კუპიურაზე ჰარიეტ ტაბმენის გამოსახვის შესახებ თავდაპირველად გასულ წელს გახდა ცნობილი, მაგრამ ამ იდეის სისრულეში მოყვანას დონალდ ტრამპი უშლიდა ხელს, რომელიც ამ გადაწყვეტილებას "წმინდა პოლიტკორექტულობას" უწოდებდა.
ჯო ბაიდენმა კვლავ დააბრუნა აღნიშნული საკითხი დღის წესრიგში. თეთრი სახლის პრესსპიკერმა, ჯენ ფსაკიმ რეპორტიორებს უთხრა, რომ ხაზინის დეპარტამენტი "შეისწავლის პროცესის დაჩქარების გზებს".
"მნიშვნელოვანია, რომ ჩვენი სიმბოლოები, კუპიურა ასახავდეს ჩვენი ქვეყნის ისტორიასა და მრავალფეროვნებას", - დასძინა ფსაკიმ.
შეერთებული შტატების ხაზინის დეპარტამენტის განცხადებით, ტაბმენის გამოსახულება ჩაანაცვლებს ამერიკის მე-7 პრეზიდენტის, მონათმფლობელ ენდრიუ ჯექსონის გამოსახულებას.
კუპიურის დიზაინის ცვლილებისა და უსაფრთხოების წესების გათვალისწინებით, 20-დოლარიანი კუპიურა ახალი გამოსახულებით, შესაძლოა, რამდენიმე წელი არ გამოჩნდეს მიმოქცევაში.
ამ ნაბიჯით, ჰარიეტ ტაბმენი გახდება პირველი აფროამერიკელი და პირველი ქალი, რომელიც აშშ-ის ეროვნულ ვალუტაზე გამოისახება.
მანამდე, 1891-1896 წლებში, 1-დოლარიან კუპიურაზე, ყოფილი პირველი ლედი, მართა ვაშინგტონი იყო გამოსახული, 1865-1869 წლებში კი 20-დოლარიან კუპიურაზე აღბეჭდილ ჯგუფურ ფოტოზე კი მკვიდრი ამერიკელი, პოკაჰონტასი იყო გამოსახული.
ჰარიეტ ტაბმენი დაახლობით 1820 წელს, მონობაში, მერილენდის შტატში დაიბადა. ბავშვობისას მას ზედამხედველის ნასროლი მეტალის საგანი მოხვდა თავში და მძიმედ დაშავდა.
1849 წელს ჰარიეტი გაიქცა მონათა პლანტაციიდან მეზობელ პენსილვანიის შტატში. წლების განმავლობაში ჰარიეტი არაერთხელ დაბრუნდა მერილენდის შტატში, რათა იქ მცხოვრებ მონებს გაქცევაში დახმარებოდა. საბოლოო ჯამში, ჰარიეტ ტაბმენმა 300-მდე მონის გათავისუფლება მოახერხა.
მოგვიანებით, ჰარიეტი სამოქალაქო ომის დროს ამერიკის არმიაში მუშაობდა. ომის შემდეგ, ნიუ იორკში გადავიდა საცხოვრებლად, სადაც ქალთა სუფრაჟისტულ da მონობის საწინააღმდეგო მოძრაობებში ჩაერთო.
გარდაიცვალა 1913 წელს, 91 წლის ასაკში. ჰარიეტ ტაბმენის შესახებ 2019 წელს ფილმი გადაიღეს, სახელწოდებით "ჰარიეტი".