მოსკოვის ცენტრში მიმდინარე საპროტესტო აქციაზე, პოლიციამ დააკავა კრემლის მწვავე კრიტიკოსის, ალექსეი ნავალნის მეუღლე იულია ნავალნაია.
მანამდე დააკავეს ნავალნის თანაგუნდელი და ანტიკორუფციული ფონდის თანამშრომელი ლიუბოვ სობოლი.
დღეს, 23 იანვარს მთელი რუსეთის მასშტაბით მიმდინარეობს საპროტესტო აქციები კრემლის კრიტიკოსის, ოპოზიციონერ ალექსეი ნავალანის მხარდასაჭერად.
საპროტესტო აქციებისკენ ალექსეი ნავალნიმ ჯერ კიდევ მანამდე მოუწოდა მოსახლეობას, ვიდრეს მას ხიმკის რაიონული სასამართლო 30-დღიან პატიმრობას შეუფარდებდა.
რუსული მედიის ინფორმაციით, შორეული აღმოსავლეთსა და ციმბირის რეგიონებში მიმდინარე აქციები ბოლო ათწლეულის განმავლობაში ყველაზე ხალხმრავალი და მასშტაბურია.
ბოლო ინფორმაციით, პოლიციის მიერ საპროტესტო აქციებზე მყოფი 237 მომიტინგეზე მეტი უკვე დაკავებულია.
რუსეთის პრეიდენტის პრესმდივანმა დმიტრი პესკოვმა განაცხადა, რომ გარკვეული პროვოკატორები ხალხს აქციებისკენ მოუწოდებენ.
ალექსეი ნავალნი 17 იანვარს მოსკოვის შერემეტევოს აეროპორტში საპასპორტო კონტროლის გავლის დროს, ბერლინიდან ჩამოფრენის შემდეგ დააკავეს.
ალექსეი ნავალნი გასული წლის აგვისტოში მოწამლეს ნერვული აგენტი "ნოვიჩოკით". ის სამკურნალოდ ბერლინში გადაიყვანეს, სადაც ექიმებმა მოახერხეს მისი გადარჩენა. კრემლმა არაერთხელ უარყო რაიმე სახის მონაწილეობა მის მოწამვლაში.