შეერთებული შტატების არჩეული პრეზიდენტის, ჯო ბაიდენის პრესსპიკერის ჯენ ფსაკის განცხადებით, ქვეყანაში შენარჩუნდება მოგზაურობაზე დაწესებული შეზღუდვები, რომლებიც ცოტა ხნის წინ, დონალდ ტრამპმა პრეზიდენტობის ბოლო დღეებში, აღმასრულებელი ბრძანებით გააუქმა.
დონალდ ტრამპმა ხელი მოაწერა ბრძანებას, რომლითაც შენგენის ზონიდან, დიდი ბრიტანეთიდან, ირლანდიიდან და ბრაზილიიდან აშშ-ში შესვლაზე დაწესებული შეზღუდვები გააუქმა.
ბრძანებაში ნათქვამია, რომ ჩინეთისა და ირანისთვის სამოგზაურო აკრძალვები ძალაში დარჩება. ტრამპის ბრძანება ძალაში 26 იანვრიდან უნდა შევიდეს.
ჯენ ფსაკის განცხადებით, ახლა შეზღუდვების შემსუბუქების დრო არ არის.
შეერთებულმა შტატებმა ევროპიდან მომავალ მოგზაურებს შეზღუდვები გასული წლის მარტში დაუწესა, ბრაზილიას კი მაისში.
"ჩვენი სამედიცინო გუნდის რეკომენდაციების გათვალისწინებით, ახალი ადმინისტრაცია არ აპირებს ამ შეზღუდვების გაუქმებას", - განაცხადა ფსაკიმ პრეზიდენტ ტრამპის ბრძანების გამოქვეყნებისთანავე.
"საერთაშორისო მოგზაურობასთან დაკავშირებით საზოგადოებრივი ჯანდაცვის ზომების გაძლიერებას ვგეგმავთ, რათა „კოვიდ-19“-ის გავრცელება შევამციროთ", - დასძინა პრესსპიკერმა.
მისივე თქმით, მსოფლიოში გავრცელებული კორონავირუსის ახალი ვარიანტების ფონზე, საერთაშორისო მოგზაურობაზე შეზღუდვების მოხსნის დრო არ არის.
გასულ კვირას, ამერიკის დაავადებათა კონტროლის ცენტრის რეკომენდაციის შესაბამისად, ამერიკაში შესასვლელად კოვიდ-19-ის ტესტი სავალდებულო გახდა.
ახალი წესების თანახმად, რომლებიც ძალაში 26 იანვარს შევა, იმისთვის, რომ ადამიანს ამერიკაში შემოსვლის უფლება მიეცეს, მან შეერთებულ შტატებში გამოფრენამდე მინიმუმ სამი დღით ადრე გაკეთებული კოვიდ-19-ის უარყოფითი ტესტი უნდა იქონიოს. ამ მგზავრთა სიაში ამერიკის მოქალაქეებიც შედიან.