მადრიდის ხელისუფლებამ უჩვეულო დიდთოვლობის შედეგად ქალაქისთვის მიყენებული ზარალი 1.4 მლრდ ევროდ შეაფასა და ცენტრალურ ხელისუფლებას ქალაქის სტიქიის ზონად გამოცხადება სთხოვა.
"ბოლო დღეებში ქალაქისთვის მიყენებული გამანადგურებელი ზიანი 1.4 მლრდ-მდე ევროდ შეფასდა. ზარალის გამოანგარიშებისას გავითვალისწინეთ ეკონომიკური საქმიანობის შეფერხება, ინფრასტრუქტურისა და ქონების დაზიანებები, ასევე ქალაქში არსებული ხეები, რომელიც თოვლმა და ყინვამ გაანადგურა", - თქვა მადრიდის მერმა პრესკონფერენციაზე.
მადრიდის მერმა დაჟინებით მოუწოდა ესპანეთის ხელისუფლებას, დაუყოვნებლივ გამოაცხადოს ქალაქი სტიქიის ზონად.
"კატასტროფის მასშტაბები ისეთია, რაც არასდროს გვინახავს", - განაცხადა მადრიდის ვიცე-მერმა იმავე პრესკონფერენციაზე.
მისი თქმით, სტიქიის ზონად გამოცხადება მადრიდს დაეხმარება უფრო მეტი ფინანსური რესურსი მოიზიდოს ცენტრალური ბიუჯეტიდან ზიანის შედეგების აღმოსაფხვრელად.
ამ დროისთვის, მადრიდი სტიქიის შედეგებს ებრძვის. მიმდინარეობს გზების ინტენსიური წმენდა, განადგურებული ხეებისგან ქუჩების გათავისუფლება, აღდგენილია საგარეუბნო მატერებლების მოძრაობა. ნაწილობრივ მუშაობა განაახლა ბარახასის აეროპორტმა.
მადრიდის ხელისუფლება მოსახლეობას მოუწოდებს, მუშაობა დისტანციურად განაგრძონ. სკოლები 18 იანვრამდე დახურულია.
გასული კვირას, ესპანეთს ქარიშხალი "ფილომენა" დაატყდა თავს. ქარიშხალს უხვთოვლობა, ძლიერი ქარი, წვიმები და რეკორდული ყინვა მოჰყვა.
დიდთოვლობამ, რომელიც 1971 წლის შემდეგ ქალაქს არ უნახავს, მადრიდის პარალიზება გამოიწვია.