ჯანმრთელობის მსოფლიო ორგანიზაციის ექსპერტთა გუნდი ჩინეთის ქალაქ უხანში კორონავირუსის წარმოშობის შესასწავლად ჩავიდა.
ექსპერტთა გუნდი 10 მეცნიერისგან შედგება. თავდაპირველად ისინი ორკვირიან კარანტინს გაივლიან. მხოლოდ ამის შემდგომ შეუდგებიან ექსპერტები სამუშაოს.
დაგეგმილია ვიზიტები სამედიცინო ინსტიტუტებში, საავადმყოფოებში და ზღვის პროდუქტების ბაზარში, რომელიც დაკავშირებულია 2019 წლის ბოლოს, უხანში კორონავირუსის ეპიდემიის აფეთქებასთან.
ერთ-ერთი ექსპერტი, პროფესორი დეილ ფიშერი BBC-სთან საუბრისას აცხადებს, რომ ვიზიტი სამეცნიერო ხასიათისაა და არავითარი კავშირი პოლიტიკასთან არ აქვს.
მისივე თქმით, მეცნიერთა უმეტესობას მიაჩნია, რომ ვირუსი ბუნებრივი წარმოშობისაა.
ჩინეთს ხშირად აკრიტიკებდნენ, განსაკუთრებით აშშ, იმის გამო, რომ იგი საკმარისად გამჭვირვალე არ იყო ეპიდემიის საწყის ეტაპზე და დანარჩენ მსოფლიოს დროულად არ მიაწოდა ინფორმაცია ვირუსის შესახებ.