ქალაქ ნიუ იორკის მერია, გასულ კვირას კაპიტოლიუმზე მომხდარი იერიშის შემდეგ, წყვეტს ტრამპის ორგანიზაციასთან [The Trump Organizaition] გაფორმებულ კონტრაქტებს. აღნიშნულის შესახებ ნიუ იორკის მერკმა, ბილ დე ბლაზიომ განაცხადა.
"ამბოხების წაქეზება შეერთებული შტატების მთავრობის წინააღმდეგ აშკარად დანაშაულებრივი ქმედებაა. ასე, რომ ქალაქ ნიუ იორკს აღარ ექნება არანაირი კავშირის ტრამპის ორგანიზაციასთან", - განაცხადა ბილ დე ბლაზიომ ტელეკომპანია MSNBC-ს.
ტრამპის ორგანიზაციას კონტრაქტები გაფორმებული აქვს ცენტრალური პარკის ატრაქტიონთან, ცენტრალურ პარკში მდებარე ორ ყინულის საციგურაო მოედანთან და გოლფის მოედანთან ბრონქსის რაიონში. სააგენტო Reuters-ის ცნობით, კონტრაქტების ღირებულება ყოველწლიურად 17 მილიონ დოლარს შეადგენს.
დონალდ ტრამპის ვაჟი ერიკ ტრამპი, რომელიც საოჯახო ბიზნესს თავის ძმასთან ერთად განაგებს, გამოეხმაურა ნიუ იორკის მერიის გადაწყვეტილებას.
"ეს გადაწყვეტილება ბილ დე ბლაზიოს არაკომპეტენტურობისა და ფაქტების აშკარა უგულვებელყოფის ნათელი მაგალითია", - განაცხადა ერიკ ტრამპმა.
მისი განცხადებით, ტრამპის ორგანიზაცია კონტრაქტების გაწყვეტას არ შეურიგდება.
"ნიუ-იორკს არ აქვს იურიდიული უფლება, შეწყვიტოს ჩვენი კონტრაქტები და თუ ისინი ამას მაინც გააკეთებენ, ტრამპის ორგანიზაციისთვის მილიონობით დოლარის გადახდა მოუწევთ. ეს სხვა არაფერია, თუ არა პოლიტიკური დისკრიმინაცია და ჩვენ ვგეგმავთ ენერგიულ ბრძოლას", - დასძინა ერიკ ტრამპმა.
გუშინ ცნობილი გახდა, რომ გერმანული "დოიჩე ბანკი", დონალდ ტრამპის ერთ-ერთი მთავარი ფინანსური მოკავშირე, კაპიტოლიუმზე თავდასხმის შემდეგ ტრამპთან თანაშრომლობას წყვეტს.
გერმანული ბანკი აღარ აპირებს ტრამპთან ან მის კომპანიებთან თანაშრომლობის გაგრძელებას.
"ამერიკის ხმის" ინფორმაციით, ოფიციალურ განცხადებაში ბანკმა თქვა, რომ ის მომავალში ტრამპთან საქმეს აღარ დაიჭერს. ამ ეტაპზე ბანკში დონალდ ტრამპის ყველაზე დიდი აქტივები ინახება. ამერიკაში "დოიჩე ბანკის" ოპერაციების ხელმძღვანელმა განცხადება გააკეთა და 6 იანვარს ვაშინგტონში განვითარებული მოვლენები დაგმო.
სააგენტო Reuters-ი ჯერ კიდევ ნოემბერში აცხადებდა, რომ გერმანული ბანკი დონალდ ტრამპთან პრეზიდენტობის ვადის დასრულების შემდეგ თანამშრომლობის გაწყვეტას გეგმავდა. ბანკი მაშინ განმარტავდა, რომ დონალდ ტრამპთან ურთიერთობით მათ რეპუტაციას ზიანი ადგებოდა.
გარდა ამისა, ნიუ იორკის Signature Bank-მა განაცხადა, რომ იგი დახურავს ტრამპის პირად ანგარიშებს და უერთდება მოწოდებებს, დონალდ ტრაპმის გადადგომასთან დაკავშირებით.
ამასთან, Signature Bank-ი აცხადებს, რომ იგი საქმიან კავშირებს გაწყვეტს კონგრესის თითოეულ წევრთან, რომლებიც ჯო ბაიდენის საპრეზიდენტო არჩევნებში გამარვების დადასტურების ხელის შეშლას ცდილობდნენ.
"ჩვენ დავინახეთ, რომ შეერთებული შტატების პრეზიდენტმა მხარი დაუჭირა ამბოხებულებს და თავი შეიკავა ეროვნული გვარდიის მოწვევისგან, რათა დაეცვა კონგრესი თავისი მოვალეობის შესრულების დროს", - ნათქვამია Signature Bank-ის განცხადებაში.
მანამდე, უმსხვილესმა ამერიკულმა კორპორაციებმა განაცხადეს, რომ ისინი უარს იტყვიან იმ კონგრესმენებისთვის შემოწირულობის გაღებისაზე, რომლებიც ხელს უშლიდნენ ბაიდენის გამარჯვების დამტკიცებას.
სასტუმროების ქსელ Marriott International-მა პირობა დადო, რომ იგი არ დააფინანსებს არცერთი პოლიტიკოსის კამპანიას, ვინც კონგრესში ბაიდენის გამარჯვების დადასტურების ხელის შეშლას ცდილობდა.
ჯანმრთელობის დაზღვევის კომპანია Blue Cross Blue Shield–მა და ფინანსურმა ცენტრმა Citibank– მა ასევე განაცხადეს, რომ ისინი შეაჩერებენ შემოწირულობებს იმ კანონმდებლებისთვის, რომლებიც აშშ-ს დემოკრატიული პროცესის წინააღმდეგ გამოვიდნენ.
Bank of America-მ, Ford Motor Co-მ და სატელეკომუნიკაციო ფირმა AT&T-მა განაცხადეს, რომ ვაშინგტონში განვითარებულ მოვლენებს მხედველობაში მიიღებენ, როდესაც გადაწყვეტენ ამა თუ იმ პოლიტიკოსის დაფინანსებას.
კონგრესში ჯო ბაიდენის საპრეზიდენტო არჩევნებში გამარჯვების დადასტურება 6 იანვარს მიმდინარეობდა, რა დროსაც დონალდ ტრამპის მომხრეები შენობაში შეიჭრნენ. კონგრესის ორივე პალატამ სხდომა შეწყვიტა და მხოლოდ უსაფრთხოების ნორმების აღდგენის შემდეგ განაგრძო.
სხდომის განახლების შემდეგ, წარმომადგენელთა პალატისა და სენატის რესპუბლიკელი წევრების ნაწილი ბაიდენის გამარჯვების დადასტურების წინააღმდეგ გამოვიდა, თუმცა მათი მცდელობა უარყოფილ იქნა ორივე პალატის მიერ.