შტორმმა "ფილომენამ" ესპანეთში ჰაერის ტემპერატურის მკვეთრი ვარდნა გამოიწვია. ესპანეთის 2 პროვინციაში 12 იანვრის ღამეს ჰაერის ტემპერატურა -25 გრადუსამდე დაეცა.
ქალაქ ბელოში, ტერუელის პროვინციაში [არაგონის ავტონომიური გაერთიანება ჩრდილოეთ ესპანეთში], სინოპტიკოსებმა დააფიქსირეს ტემპერატურა -25,4 გრადუსი, მოლინა დე არაგონში [გვადალახარის პროვინცია ესპანეთის ცენტრში კასტილია-ლა მანჩას ავტონომიურ თემში] კი - მინუს 25, 2 გრადუსი.
დღეს დილით, ქვეყნის 50 პროვინციიდან 41-ში მეტეოროლოგებმა დაბალი ტემპერატურის შესახებ გაფრთხილება გაავრცელეს. ცივი ამინდია ასევე ქვეყნის იმ ნაწილებშიც კი, სადაც ზამთარში ჩვეულებრივ თბილია - ვალენსიაში, ბარსელონაში, სევილიასა და მურსიაში.
"ფილომენამ" მადრიდსა და ესპანეთის სხვა ქალაქებში უჩვეულო დიდთოვლობა გამოიწვია. მადრიდში თოვლის საფარმა 50 სმ-ს გადააჭარბა. უამინდობის გამო ქვეყანაში 7 ადამიანი დაიღუპა.