ჯანმრთელობის მსოფლიო ორგანიზაცია გამოდის მოწოდებით, სოციალური დისტანცირების ზომები წლის ბოლომდე შენარჩუნდებს, ვინაიდან ვაქცინაციის გლობალური მასშტაბით დაწყების მიუხედავად, კოლექტიური იმუნიტეტის გამომუშავებას დრო სჭირდება.
ჯანმრთელობის მსოფლიო ორგანიზაციის მთავარი მეცნიერის, სუმია სვამინათანის განცხადებით, 2021 წელს კორონავირუსის მიმართ კოლექტიური იმუნიტეტი მოსალოდნელი არ არის.
"იმ შემთხვევაშიც კი, თუ ვაქცინები დაიცავს მოსახლეობის მოწყვლად ჯგუფებს, 2021 წელს პოპულაციური იმუნიტეტის რაიმე დონის მიღწევას არ მოველით. ზოგიერთ ქვეყანაში შესაძლოა მოხდეს კოლექტიური იმუნიტეტის გამომუშავება, თუმცა ეს ვერ დაიცავს ვირუსისგან მსოფლიოს მოსახლეობას", - განაცხადა სუმია სვამინათანმა.
სვამინათანის განცხადებით, ვიდრე მსოფლიო კოლექტიურ იმუნიტეტს მიაღწევს, მნიშვნელოვანია ჯანმრთელობის დაცვის ზომების შენარჩუნება, როგორებიცაა ნიღბების ტარება და სოციალური დისტანცირება.
ჯანმრთელობის მსოფლიო ორგანიზაციის მთავარმა მეცნიერმა შეაქო მეცნიერების პროგრესი კორონავირუსის საწინააღდეგო ვაქცინის შემუშავების პროცესში და დასძინა, რომ მიუხედავად ამისა, ვაქცინის გლობალური გავრცელება დროს მოითხოვს.
ამასთან, სუმია სვამინთანმა მოსახლოებას მოთმინებისკენ მოუწოდა.