შეერთებული შტატების არჩეულმა პრეზიდენტმა, ჯო ბაიდენმა, რომელიც თეთრ სახლს 20 იანვრიდან დაიკავებს, მშობლიური დელავერის შტატიდან მოსახლეობას მიმართა.
ჯო ბაიდენი ვაშინგტონში განვითარებულ მოვლენებს და კაპიტოლიუმის შენობაში ტრამპის მხარმდამჭერთა ბრბოს შეჭრას გამოეხმაურა.
მისი თქმით, გუშინდელი დღე იყო ერთ-ერთი ყველაზე ბნელი დღე ამერიკის ისტორიაში.
"ეს არ იყო განსხვავებული აზრი, ეს არ იყო უბრალო უწესრიგობა. ეს იყო ქაოსი", - განაცხადა ბაიდენმა და დასძინა, რომ ადამიანები, რომლებიც კაპიტოლიუმში შეიჭრნენ არ იყვნენ მომიტინგეები, არამედ "აჯანყებული ბრბო" და "შიდა ტერორისტები".
"ბოლო ოთხი წლის განმავლობაში გვყავდა პრეზიდენტი, რომელმაც ნათლად გამოხატა ჩვენი დემოკრატიის, ჩვენი კონსტიტუციის, კანონის უზენაესობისადმი ზიზღი. მან თავიდანვე დაიწყო შეტევა ჩვენს დემოკრატიულ ინსტიტუტებზე", - დასძინა ბაიდენმა.