ვაშინგტონში, შეერთებული შტატების დედაქალაქში, ქვეყნის მოქმედი პრეზიდენტის დონალდ ტრამპის მხარდასაჭერად ათიათასობით ადამიანი შეიკრიბა.
მოელიან, რომ დემონსტრანტებს სიტყვით მიმართავს პრეზიდენტი ტრამპი, რომელიც რამდენიმე დღეში დატოვებს პრეზიდენტის თანამდებობას, მიუხედავად იმისა, რომ არჩევნებში დამარცხებას არ აღიარებს.
დემონსტრანტები თეთრი სახლის სიახლოვეს არიან შეკრებილნი. მოგვიანებით, ისინი შეერთებული შტატების კონგრესის შენობისკენ გაეშურებიან, სადაც ამერიკელმა კანონმდებლებმა საბოლოოდ უნდა დაადასტურონ საპრეზიდენტო არჩევნებში ჯო ბაიდენის გამარჯვება.
მანამდე ვაშინგტონის მერმა უსაფრთხოების დასაცავად და მოსალოდნელი არეულობისგან თავის ასარიდებლად, ქალაქში ეროვნული გვარდია მოიწვია.
კონგრესის დღევანდელ სხდომაზე წარმომადგენელთა პალატისა და სენატის რესპუბლიკელი წევრების ნაწილი გეგმავს არჩენების შედეგების გაპროტესტებას, თუმცა მათი ქმედება საბოლოო შედეგზე ვერავითარ გავლენას ვერ მოახდენს.
15 დეკემბერს ამომრჩეველთა კოლეგიამ აშშ-ის საპრეზიდენტო არჩევნებში ჯო ბაიდენის გამარჯვება დაამტკიცა.
3 ნოემბერს გამართული საპრეზიდენტო არჩევნების შედეგად, ჯო ბაიდენმა ამომრჩეველთა კოლეგიის წევრთა 306 ხმა მიიღო, ხოლო მოქმედმა პრეზიდენტმა, დონალდ ტრამპმა - 232 ხმა.
