დღეს, 5 იანვარს ჯორჯიის შტატის ორ ოლქში სენატის არჩევნების მეორე ტური იმართება. სწორედ ამ არჩევნების შედეგები განსაზღვრავს, თუ ვინ დაამყარებს კონტროლს აშშ-ის სენატზე.
იმისათვის, რომ რესპუბლიკელებმა კვლავ შეინარჩუნონ სენატში უმრავლესობა, საკმარისია ორი ოლქიდან ერთ-ერთში რესპუბლიკელი კანდიდატის გამარჯვება.
სენატის არჩევნები განსაკუთრებით ყურადსაღებია იმის გათვალისწინებით, რომ მის შედეგებზე იქნება დამოკიდებული, თუ რამდენად შეძლებს არჩეული პრეზიდენტი ჯო ბაიდენი თავისი პოლიტიკური დღის წესრიგის განხორციელებას.
არჩევნების მეორე ტურის წინა დღით, დონალდ ტრამპი და ჯო ბაიდენი ამომრჩევლებს შეხვდნენ და თავიანთი პარტიების მხარდაჭერისკენ მოუწოდეს.
არჩეული პრეზიდენტი ჯო ბაიდენი ჯორჯიის შტატის უდიდეს ქალაქ ატლანტაში შეხვდა ამომრჩევლებს, რათა მათთვის სენატორობის დემოკრატი კანდიდატების, ჯონ ოსოფისა და რაფაელ უორნოკის მხარდაჭერა ეთხოვა.
"სენატში მათი ხმების მეშვეობით ჩვენ შეგვიძლია მივაღწიოთ პროგრესს სამუშაო ადგილების შექმნის, ჯანდაცვისა და კლიმატის დაცვის საკითხებთან დაკავშირებით", - უთხრა ბაიდენმა ატლანტაში შეკრებილ ამომრჩევლებს.
იმავდროულად, მოქმედი პრეზიდენტი დონალდ ტრამპი დალტონში შეხვდა ამომრჩევლებს და მათ რესპუბლიკელი კელი ლეფლერისა და დევიდ პერდიუს მხარდაჭერისკენ მოუწოდა.
ტრამპის თქმით, სენატში დემოკრატების უმრავლესობა ბიძგს მისცემს მოძრაობას, რასაც ის ხშირად "რადიკალურ მემარცხენეობას" უწოდებს.
ამ დროისთვის, სენატში 50 მანდატს რესპუბლიკელები ფლობენ, დემოკრატები კი 48 მანდატს. ამიტომაც სენატში უმრავლესობის მოსაპოვებლად დემოკრატებმა ჯორჯიის შტატის ორივე ოლქში უნდა გაიმარჯვონ. ასეთ შემთხვევაში სენატში მანდატების რაოდენობა თანაბრად განაწილდება (50-50) რესპუბლიკელებსა და დემოკრატებს შორის. ასეთ დროს კი გადამწყვეტი ხმა აქვს ქვეყნის ვიცე-პრეზიდენტს, რომელიც 20 იანვრის შემდეგ დემოკრატი კამალა ჰარისი იქნება.
სენატის არჩევნების პირველი ტური, საპრეზიდენტო არჩევნებთან ერთად, 3 ნოემბერს ჩატარდა. მაშინ გამარჯვებისთვის აუცილებელი, ამომრჩეველთა ხმებით 50% ვერცერთმა კანდიდატმა მიიღო.