შეერთებული შტატების მოქმედმა პრეზიდენტმა, დონალდ ტრამპმა ვეტო დაადო 740-მილიარდიანი თავდაცვის ავტორიზაციის შესახებ აქტს, რომელიც კონგრესმა მიიღო მიმდინარე თვეში.
"ადმინისტრაცია აცნობიერებს კანონპროექტის მნიშვნელობას ჩვენი ეროვნული უსაფრთხოებისათვის. სამწუხაროდ, დოკუმენტი არ შეიცავს ეროვნული უსაფრთხოების მნიშვნელოვან დებულებებს. შეიცავს მუხლებს, რომლებიც შეურაცხყოფს ჩვენს ვეტერანებს და სამხედრო ისტორიას, ეწინააღმდეგება ადმინისტრაციის ძალისხმევას, უზრუნველყოს შეერთებული შტატების წამყვანი პოზიციები ეროვნული უსაფრთხოებისა და საგარეო პოლიტიკის სფეროში. ეს საჩუქარია ჩინეთისა და რუსეთისთვის", - განაცხადა დონალდ ტრამპმა.
როგორც მოსალოდნელი იყო, პრეზიდენტმა გააკრიტიკა ბიუჯეტის პროექტი, რომელიც არ აუქმებს 1996 წლის "კომუნიკაციების სფეროში ეთიკის აქტის" 230-ე ნაწილს. ეს ნაწილი ტექნოლოგიურ კომპანიებს იცავს იურიდიული პასუხისმგებლობისგან მომხმარებლის მიერ ინფორმაციის გამოქვეყნების, ამოღების ან სხვაგვარად მოდერაციისთვის.
"230-ე ნაწილი ხელს უწყობს უცხოური დეზინფორმაციის გავრცელებას ინტერნეტით, რაც სერიოზულ საფრთხეს უქმნის ეროვნულ უსაფრთხოებას და არჩევნების სამართლიანობას. ის უნდა გაუქმდეს", - თქვა ტრამპმა.
ტრამპი ეწინააღმდეგება, ამერიკულ სამხედრო ბაზებისთვის კონფედერაციის ლიდერების სახელების გადარქმევას.
დონალდ ტრამპი ასევე აკრიტიკებს იმ პუნქტებს, რომლებიც ეხება ავღანეთში, კორეის რესპუბლიკასა და გერმანიაში აშშ-ის ჯარების რაოდენობის შემცირების შეზღუდვებს.
"უამრავი დებულება პირდაპირ ეწინააღმდეგება ჩემი ადმინისტრაციის საგარეო პოლიტიკას, განსაკუთრებით ჩვენს ძალისხმევას სამხედრო მოსამსახურეების სახლში დაბრუნების შესახებ", - თქვა პრეზიდენტმა.
პრეზიდენტის ვეტოს შემდეგ კანონპროექტის კონგრესს დაუბრუნდება. პრეზიდენტის ვეტოს დასაძლევად აშშ-ის კონგრესის ორივე პალატის წევრთა ხმების ორი მესამედია საჭირო.
თუ კონგრესმა არ/ვერ დაძლია პრეზიდენტის ვეტო, ეს იქნება პირველი შემთხვევა ბოლო 60 წლის განმავლობაში, როდესაც თავდაცვის ავტორიზაციის შესახებ კანონპროექტი კანონად ვერ იქცა.
კონგრესის წარმომადგენელთა პალატის სპიკერმა ნენსი პელოსიმ განაცხადა, რომ ტრამპის ვეტო არის "გამაოგნებელი ქმედება, რომელიც ზიანს აყენებს ჩვენს ჯარებს, საფრთხეს უქმნის ჩვენს უსაფრთხოებას და ძირს უთხრის ორპარტიული კონგრესის ნებას".
