აჭარის ეკონომიკური განვითარება, მიმდინარე და დაგეგმილი საინვესტიციო პროექტები - აღნიშნული საკითხები აჭარის ეკონომიკური განვითარების საბჭოს სხდომაზე განიხილეს.
პანდემიის შედეგად არსებული გამოწვევების ეფექტურად დაძლევის მიზნით, აჭარის მთვარობამ ეკონომიკის სტიმულირების არაერთი ინიციატივა განახორციელა. სხდომაზე ეკონომიკის გაძლიერების ახალ მექანიზმებზე იმსჯელეს. ეკონომიკური განვითარების საბჭოს სხდომის წევრებმა, აჭარაში ბიზნეს სექტორის სტიმულირებაზე და მხარდაჭერაზე ისაუბრეს, რაც პირველ ეტაპზე სამუშაო ადგილების შენარჩუნებას, ხოლო გრძელვადიან პერსპექტივაში რეინვესტირების ზრდას განაპირობებს.
აჭარაში საინვესტიციო პროცესების ხელშეწყობის მიზნით, სხდომაზე სხვადასხვა მნიშვნელოვანი გადაწყვეტილება იქნა მიღებული:
➡საბჭოს სხდომაზე განიხილეს შპს „რეკან გრუპ ჯორჯია”-ს მიერ 50 მლნ დოლარის ღირებულების საინვეტიციო პროექტი, რომელიც ახალ ბულვარში ხორციელდება და საერთაშორისო ბრენდის სასტუმროები შენდება. კომპანიას განესაზღვრა სასტუმროს 15 წლით პროფილის შენარჩუნების და პროფილის ვადით არანაკლებ 80% საქართველოს მოქალაქეების დასაქმების ვალდებულება.
➡კომპანია „გრინ რეზორტი“ საინვესტიციო არეალს აფართოებს და ახალი ინვესტიციის ფარგლებში, ქობულეთში, „მწვანე ქალაქის“ ტერიტორიის მომიჯნავედ დამატებით 250 მილიონი ლარის ახალ საინვესტიციო პროექტს განახორციელებს. კომპანია მაღალი კლასის 50 ვილის, იპოდრომის, ასევე გასართობი და სპორტული ინფრასტრუქტურის მოწყობას უზრუნველყოფს.
➡ეკონომიკურ საბჭოზე, გონიოში, შპს ,,გონიო 5 მგზავრების” მიერ 20 მლნ ლარის ღირებულების საინვესტიციო პროექტის ფარგლებში, სასტუმრო კომპლექსის მშენებლობასა და ვადებზე იმსჯელეს.
➡სხდომაზე, დამატებითი ვადების მიცემის შესახებ განკარგულების ფარგლებში, გონიოში, ნახევარი მილიონი ლარის საინვესტიციო ღირებულების თანამედროვე სტანდარტების სასტუმროს მშენებლობა განიხილეს, რომელსაც გიორგი კლდიაშვილი ახორციელებს.
