პოლონეთში აბორტის თითქმის სრული აკრძალვის მოწინააღმდეგეების მღელვარება უკვე მეხუთე დღეა არ ცხრება.
ათასობით ადამიანი პოლონეთის დედაქალაქ ვარშავასა და სხვა დიდ ქალაქებში აპროტესტებს ქვეყნის საკონსტიტუციო სასამართლოს მიერ მიღებულ გადაწყვეტილებას, რომლის მიხედვითაც ფაქტობრივად აბორტი სრულად იკრძალება.
დემონსტრანტებმა გადაკეტეს მთავარი გზები, შეაყოვნეს ავტომობილებისა და ტრამვაის მოძრაობა დაახლოებით 1 საათის განმავლობაში.
ზოგიერთ დემონსტრანტს ხელთ ეპყრა პლაკატი წარწერით „ვისურვებდი, შემეძლოს ჩემი მთავრობის აბორტი“.
დღეს, საპროტესო აქციები და სატრანსპორტო ბლოკადა დაახლოებით 50-მდე ქალაქში გაიმართა.
წინა დღეს მომიტინგეებმა ჩაშალეს საეკლესიო მსახურება და წარწერები გააკეთეს ვარშავის ეკლესიების კედლებზე.
აბორტი უაღრესად სენსიტიური საკითხია პოლონეთში, სადაც დიდია რომის კათოლიკური ეკლესიის გავლენა. 2014 წელს ჩატარებული კვლევების მიხედვით, გამოკითხულ პოლონელთა 65% წინააღმდეგია აბორტისა, 27% მიიჩნევს, რომ ეს მისაღებია და 8% არ არის დარწმუნებული.
პოლონეთში ყოველწლიურად დაახლოებით 1000-მდე ლეგალური აბორტი კეთდება. ქალთა უფლებადამცველი ორგანიზაციების თქმი, ფარულად ან საზღვარგარეთ განხორციელებული აბორტების რიცხვი შეიძლება მერყეობდეს 80 000-დან 120 000-მდე.
შეგახსენებთ, პოლონეთის საკონსტიტუციო სასამართლომ არაკონსტიტუციურად ცნო ფიზიკური ნაკლის ან ჯანმრთელობის პრობლემების მქონე ნაყოფის მოცილება.
ამ გადაწყვეტილების შემდეგ, პოლონეთში ლეგალური იქნება მხოლოდ გაუპატიურების და ინცესტის შემთხვევაში. ასევე იმ დროს, თუ ნაყოფი დედის სიცოცხლისთვის საფრთხეს შეიცავს.
ფოტო: EPA
