საქართველოს მესამე პრეზიდენტი მიხეილ სააკაშვილი აცხადებს, რომ არჩევანა არა მასსა და ივანიშვილს შორის, არამედ წარსულსა და მომავალს, საქართველოს სიყვარულსა და უცხო ქვეყნის მონობას შორის უნდა გაკეთდეს. ამის შესახებ სააკაშვილმა "ტვ პირველის" ეთერში ისაუბრა.
მისი თქმით, ყველაზე მეტად ივანიშვილს სააკაშვილის და ნაციონალური მოძრაობის ეშინია.
"ჩემი ეშინიათ, იმიტომ რომ მე შემიძლია ყველასთან თანამშრომლობა. გუბაზ სანიკიძეზე მეტად არავისზე არ ვიყავით გადაკიდებული, მაგრამ ხედავთ, როგორ ერთად ვმოქმედებთ, იგივე მურმან დუმბაძე... ამისი ეშინია, საკმარისია ფეხი დავადგა ქართულ მიწაზე, მთელი ის მითები, "სააკაშვილი ყველას დაერევა, ყველას დაჭამს, გიჟია", ყველაფერი ჩამოეშლება, რადგან ჩემი ერთადერთი ამოცანა არის, რომ საქართველო სწრფადა წავიდეს წინ და ყველა ადამიანი, ყველაზე გადამტერებულიც კი გუშინ, იყოს ამ საქმეში მოკავშირე", - თქვა სააკაშვილმა.
მისივე თქმით, ივანიშვილსა და ოპოზიციას შორის უნდა გაკეთდეს არჩევანი, "იმიტომ რომ ისინი არიან არაფრის მკეთებლები და ჩვენ მოქმედი საქმის მკეთებლები ვართ დღეს".
"უკაცრავად, ვის აქვს მეტი გამოცდილება აღმშენებლობის არა მხოლოდ საქართველოში, არამედ საერთაშორისო მასშტაბით. ნახეთ, რა პროექტები მაქვს განხორციელებული უკრაინაში. ბოლო რამდენიმე წელიწადი ვის ჰქონდა დღევანდელი ოპოზიციიდან შესაძლებლობა ხელით შეხებოდა და გაეკეთებინა აღმშენებლობის პროექტები ევროპის ყველაზე დიდ ქვეყანაში. მე ავაშენე ყველაზე დიდი მაგისტრალი, რომელზედაც ოცნებობდა უკრაინის სამხრეთი ბოლო 50 წელიწადია. მე ავაშენე თანამედროვე სერვისცენტრები და უამრავი სხვა ახალი კონცეპტუალური თემები შევთავაზე უკრაინას...
ასე, რომ აქ საუბარია რატომ ეშინიათ ჩვენი, რატომ არის ჩვენსა და მათ შორის არჩევანი, იმიტომ რომ ისინი არიან არაფრის მკეთებლები, ივანიშვილი და მისი გუნდი და ჩვენ მოქმედი საქმის მკეთებლები ვართ დღეს", - განაცხადა მიხეილ სააკაშვილმა.
