თბილისის ნაფიც მსაჯულთა სასამართლომ სრულად გაიზიარა ბრალდების მხარის მიერ წარდგენილი მტკიცებულებები და დოდო გუგეშაშვილის განზრახ მკვლელობის მცდელობისა და მისი შვილის ნოდარ გუგეშაშვილის მკვლელობის ფაქტზე ბრალდებული ზ.მ. ერთხმად ცნო დამნაშავედ.
თბილისის საქალაქო სასამართლომ გამამტყუნებელი ვერდიქტის საფუძველზე ბრალდებულს 20 წლიანი პატიმრობა შეუფარდა.
შინაგან საქმეთა სამინისტროს მიერ ჩატარებული გამოძიების შედეგად, ბრალდების მხარის მიერ სასამართლო პროცესზე გამოკვლეული მტკიცებულებებით დადასტურდა, რომ 2018 წლის 7 თებერვალს, ბრალდებულმა ზ.მ.-მ საკუთარ საცხოვრებელ სახლში გულმკერდის არეში მძიმედ დაჭრა დოდო გუგეშაშვილი, რის შემდეგაც ცეცხლსასროლი იარაღიდან ორი გასროლა განახორციელა მისი შვილის ნოდარ გუგეშაშვილის მიმართულებით, რომელიც მიღებული დაზიანებით ადგილზე გარდაიცვალა.
სასამართლო პროცესზე ბრალდების მხარემ დაზარალებული დოდო გუგეშაშვილი და მისი საცხოვრებელი კორპუსის სხვა მობინადრეები დაკითხა, რომლებმაც ბრალდებული, როგორც დანაშაულის ჩამდენი პირი ამოიცნეს.
ასევე, პროკურორებმა სასამართლოს წარუდგინეს სატელეფონო კავშირების ამსახველი ინფორმაცია, ვიდეომასალა და ექსპერტიზის დასკვნები, რომლითაც ბრალდებულის მიერ დანაშაულის ჩადენის ფაქტი უტყუარად დადასტურდა.
ნაფიცი მსაჯულების მიერ ერთხმად გამოტანილი ვერდიქტის საფუძველზე სასამართლომ ბრალდებული დამნაშავედ ცნო 109-ე მუხლის პირველი ნაწილის ,,გ" (განზრახ მკვლელობა სხვა დანაშაულის გაადვილების და დაფარვის მიზნით) და 19, 109 მუხლის მესამე ნაწილის ,,ა" პუნქტით (ორი პირის განზრახ მკვლელობის მცდელობა), ასევე, 236-ე მუხლის მეორე და მესამე ნაწილებით (ცეცხლსასროლი იარაღის უკანონო შეძენა, შენახვა, ტარება). სასამართლოს გადაწყვეტილებით, ზ.მ.-ს სასჯელის სახით 20 წლით თავისუფლების აღკვეთა შეეფარდა.