თავდაცვის მინისტრმა ირაკლი ღარიბაშვილმა, ტელეკომპანია "იმედის" გადაცემაში "ნამდვილი რიცხვები" დავით გარეჯის საკითხზე საუბრისას განაცხადა, რომ "ქართული ოცნების" თავმჯდომარის, ბიძინა ივანიშვილის წვლილი რუკების მოძიების პროცესში განსაკუთრებულია.
"ჩვენი პარტიის თავმჯდომარემ მოახერხა უნიკალური რამ - შექმნა პრეცედენტი, რაც ქართველებს ბოლო 30 წელია არ გვინახავს და ამას არ უფიქრდება არავინ, საუბედუროდ, იმიტომ, რომ არ გვესმის მშვიდობის ფასი", - თქვა ღარიბაშვილმა.
მისი თქმით, ახლა არის 8-წლიანი უიშვიათესი პერიოდი, როდესაც ომი არ ყოფილა ქვეყანაში.
მისივე თქმით, "მტრული ძალა მუდმივად ცდილობს ქვეყანაში იყოს დესტაბილიზაცია და ქაოსი".
"ეს არის პატრიოტული, ეროვნული საქმე, რომელიც ბატონი ბიძინას ჩართულობით, მისი უშუალო დავალებით და ხელმძღვანელობით განხორციელდა. მე ღრმად ვარ დარწმუნებული, რომ ამ საქმეს ჩვენ მივიყვანთ ბოლომდე, რა თქმა უნდა, კონსტრუქციული დიალოგით, ცივილიზებულ ფორმებში ჩვენს სტრატეგიულ პარტნიორთან, აზერბაიჯანთან ერთად", - განაცხადა ირაკლი ღარიბაშვილმა.
