გერმანიის ფედერაციული რესპუბლიკის კანცლერი ანგელა მერკელი ბელარუსის ოპოზიციის ლიდერს სვეტლანა ციხანოვსკაიას 6 ოქტომბერს შეხვდება. იუწყება "დოიჩე ველე" კანცლერის პრესმდივნის, ულრიკე დემერზე დაყრდნობით.
ულრიკე დემერის განცხადებით, მერკელისა და ციხანოვსკაიას შეხვედრა ბერლინში გაიმართება.
შეხვედრაზე განხილული იქნება ბელარუსში არსებული ვითარება და კრიზისიდან გამოსვლის გზები.
თავდაპირველად, მერკელთან შეხვედრის შესახებ ინფორმაცია თავად ციხანოვსკაიამ გაავრცელა.
მისი განცხადებით, "იგი ასევე გეგმავს არაერთ შეხვედრას ევროპაში, რომელთაგან ზოგი ონლაინ რეჟიმში ჩატარდება, ზოგიც პირადად".
"მაგრამ ყველა მათგანი ძალიან მნიშვნელოვანია ჩვენი საკითხის მშვიდობიანი მოგვარებისთვის", - დასძინა ბელორუსის ოპოზიციის ლიდერმა.
მანამდე ბელარუსის ოპოზიციის ლიდერი სვიატლანა ციხანოვსკაია ვილნიუსში საფრანგეთის პრეზიდენტ ემანუელ მაკრონს შეხვდა.
გავრცელებული ცნობით, შეხვედრაზე ისაუბრეს ახალ, თავისუფალ, დემოკრატიულ არჩევნებზე, რომელის გამართვასაც ოპოზიცია მიმდინარე წლის განმავლობაში მოითხოვს.
"მნიშვნელოვანია, რომ ევროპის ქვეყნებმა ბელარუსში მიმდინარე მოვლენებისადმი გულგრილობა არ გამოიჩინონ. საფრანგეთს, როგორც ერთ-ერთი უძველესი დემოკრატიის ქვეყანას, შესანიშნავად ესმის ჩვენი. ამიტომ ვაპირებ შევახსენო ბატონ მაკრონს ჩვენი მთავარი მიზნის - ახალი, დემოკრატიული და გამჭვირვალე არჩევნების შესახებ, რომელიც ამ წლის განმავლობაში უნდა გაიმართოს", - განაცხადა ციხანოვსკაიმ შეხვედრის დაწყებამდე.
ფრანგული გამოცემა France24-ის ინფორმაციით, იგეგმება ციხანოვსკაიას საფრანგეთის პარლამენტის წინაშე სიტყვით გამოსვლა.
ბელარუსში მასობრივი საპროტესტო აქციები 9 აგვისტოს პრეზდენტის არჩევნების შემდეგ დაიწყო.
აქციის მონაწილეები არჩევნების შედეგებს არ ეთანხმებიან და ხელახალი არჩევნების დანიშვნას მოითხოვენ.
ევროკავშირი არჩევნების შედეგებს არ ცნობს და ლუკაშენკას ლეგიტიმურ პრეზიდენტად არ აღიარებს.