რუსეთის პრეზიდენტმა ვლადიმირ პუტინმა საფრანგეთის პრეზიდენტ ემანუელ მაკრონთან საუბრისას თქვა, რომ რუს ოპოზიციონერ პოლიტიკოსს ალექსეი ნავალნის, გაურკვეველი მიზეზის გამო, შესაძლოა თავი თვითონ მოეწამლა. ინფორმაციას გამოცემა Meduza ფრანგულ გაზეთ Le monde-ზე დაყრდნობით ავრცელებს.
Le Monde-ი არაფერს იუწყება იმასთან დაკავშირებით, თუ ვისზე დაყრდნობით მოიპოვა პუტინისა და მაკრონის საუბრის შესახებ ინფორმაცია.
გაზეთის ინფორმაციით, ემანუელ მაკრონმა პუტინთან საუბრისას უარყო მისი ვარაუდი, რომ შესაძლოა ნავალნის თავი თვითონ მოეწამლა.
პუტინსა და მაკრონს შორის სატელეფონო საუბარი ფრანგული მხარის ინიციატივით, 14 სექტემბერს გაიმართა.
სატელეფონო დიალოგის დროს, რუსეთის პრეზიდენტმა ნავალნის "ინტერნეტში უბრალოდ პრობლემების შემქმნელი" უწოდა და თქვა, რომ ანტიკორუფციული ფონდი, რომელიც ოპოზიციონერმა დააარსა, დეპუტატებსა და ოფიციალურ პირებს აშანტაჟებს.
ალექსეი ნავალნი შეუძლოდ 20 აგვისტოს, ტომსკიდან მოსკოვის მიმართულებით ფრენის დროს, გახდა. თვითმფრინავმა საგანგებო დაშვება ომსკის აეროპორტში მოახდინა. ოპოზიციონერი კომატოზურ მდგომარეობაში ომსკის საავადმყოფოს რეანიმაციულ განყოფილებაში მოათავსეს. 22 აგვისტოს იგი გერმანიაში, ბერლინის "შარიტეს" კლინიკაში გადაიყვანეს სამკურნალოდ.
2 სექტემბერს გერმანიის ხელისუფლებამ განაცხადა, რომ ნავალნის ორგანიზმში აღმოჩენილია ქიმიური ნივთიერება "ნოვიჩოკი", რომელიც პირველად სერგეი სკრიპალისა და მისი ქალიშვილის მოწამვლის დროს გახდა ცნობილი, 2018 წლის მარტში.
რუსეთის ხელისუფლება მტკიცედ უარყოფს ნავალნის მოწამვლასთან რაიმე სახის კავშირს.
ნერვული აგენტი "ნოვიჩიკი" თავდაპირველად საბჭოთა ლაბორატორიებში შეიქმნა, მოგვიანებით იგი განავითარეს რუსმა მეცნიერებმა. საწამლავი ანადგურებს ადამიანის ნერვულ სისტემას.