პარლამენტის ადამიანის უფლებათა დაცვის კომიტეტის თავმჯდომარის, სოფიო კილაძე „საქართველოს პირველ არხთან” საუბარში ამბობს, რომ კომერციული ბანკები ბავშვის ანაბართან დაკავშირებით ხელოვნური ბარიერების შექმნას ცდილობენ და ამასთანავე, მისივე თქმით, ბანკები ცდილობენ, კანონის ჩანაწერი ბოროტად გამოიყენონ, თითქოს, ბავშვის უფლებაზე ზრუნავენ.
კილაძე ამბობს, რომ პარლამენტს კანონში ანაბრებთან დაკავშირებით რეგულაციები არ ჩაუწერია და არ შეიძლება, ბანკმა ბოროტად გამოიყენოს კეთილშობილური ჩანაწერი, რომელიც უწყებამ ბავშვების დაცვის მიზნით შეიმუშავა.
„მგონია, რომ ბანკების ნაწილი სიტუაციას იყენებს. ის, რაც რეალურად, „სამოქალაქო კოდექსში“ შავით თეთრზე წერია, ბანკები თავის სასარგებლოდ იყენებენ და ჩანაწერის ინტერპრირებას ახდენენ. არ შეიძლება, იურისტს მოძრავი ან უძრავი ნივთი მოთხოვნის უფლებაში აგერიოს. ამ შემთხვევაში, სწორედ მოთხოვნის უფლებასთან გვაქვს საქმე. პირი, რომელიც ანაბარს ბავშვის სასარგებლოდ გახსნის, მას მოთხოვნის უფლება უჩნდება სწორედ იმ თანხაზე, რომელიც ბანკში შეიტანა. ამ თანხის კუპიურებზე საკუთრება ბანკს აქვს. უბრალოდ, მეანაბრეს მოთხვოვნის უფლება აქვს, გაიტანოს ეს ფული. მოთხოვნის უფლებაზე კოდექსი პირდაპირ ამბობს, რომ რეგულაცია არ ვრცელდება“, – განაცხადა კილაძემ და აღნიშნა, რომბანკების ნაწილი საკუთარ პირად ინტერესებს ამჯობინებს და კანონი ფარად მოჰყავთ, თითქოს, ამას კანონი ეუბნება.
„კანონის ინიციატორები ვამბობთ, რომ მსგავს რეგულაციებს კანონი არ ითვალისწინებს. ვისურვებდი, რომ ბანკები მოქალაქეებზე, მათ შორის ბავშვებზე ზრუნავდნენ. სამწუხაროდ, მომხმარებელთა უფლებები ხშირად ირღვევა. ვისურვებდი, რომ თავის მოვალეობებს ასრულებდნენ და არა - გამოგონილს“, – აცხადებს დეპუტატი.