ევროკავშირის უმაღლესი წარმომადგენელი საგარეო პოლიტიკისა და უსაფრთხოების საკითხებში და ევროკომისიის ვიცე-პრეზიდენტი, ჟოზეპ ბორელი რუსეთის ოპოზიციის ლიდერის, ალექსეი ნავალნის სავარაუდო მოწამვლას ეხმიანება.
ჟოზეპ ბორელის განცხადებით, თუ ნავალნის მოწამვლა დადასტურდა, პასუხისმგებელმა პირებმა პასუხი უნდა აგონ.
"ვწუხვარ, ალექსეი ნავალნის სავარაუდო მოწამვლის ფაქტის გამო. თუ ნავალნის მოწამვლა დადასტურდა, პასუხისმგებელმა პირებმა პასუხი უნდა აგონ. სწრაფ გამოჯანმრთელებას ვუსურვებ", - წერს ევროკავშირის პირველი დიპლომატი მიკრობლოგ "ტვიტერზე".
შეგახსენებთ, რუსი ოპოზიციონერი ალექსეი ნავალნი უგონო მდგომარეობაშია. სავარაუდოდ ის მოწამლულია. ნავალნის პრესსპიკერის კირა იარმიშის განმარტებით, პოლიტიკოსი უგონო მდგომარეობაშია და ფილტვის ხელოვნურ ვენტილაციაზე იმყოფება.
გავრცელებული ინფორმაციით, ალექსეი ნავალნიმ თვითმფრინავში გონება დაკარგა, რის გამოც თვითმფრინავი ტომსკში საგანგებოდ დაჯდა.
ოჯახის წევრები ეჭვობენ, რომ ნავალნი სავარაუდოდ ჩაიში ჩაყრილი ნივთიერებით მოიწამლა, რადგან მას მხოლოდ ჩაი ჰქონდა მიღებული.
საავადმყოფოს ადმინისტრაცია იტყობინება, რომ ნავალნის მდგომარეობა სტაბილურად მძიმეა.
