ირანი და თურქეთი გმობენ ისრაელსა და არაბეთის გაერთიანებულ საამიროებს შორის შეთანხმებას ურთიერთობების ნორმალიზების შესახებ.
შეერთებული შტატების ძალისხმევითა და შუამავლობით მიღწეული შეთანხმება თელ ავივსა და აბუ დაბს შორის სრული დიპლომატიური ურთიერთბების დამყარებას ითვალისწინებს. ამავდროულად, ისრაელი შეაჩერებს თავის განზრახვას დასავლეთ სანაპიროების ანექსირების თაობაზე.
ირანმა აღნიშნულ შეთანხმებას "ყველა მუსლიმის ზურგში ჩაცემული ხანჯალი უწოდა".
თეირანის განცხადებით, შეთანხმება არაბეთის გაერთიანებული საამიროების "სტრატეგიული სისულელის აქტია" და იგი "უთუოდ გააძლიერებს წინააღმდეგობის ღერძს რეგიონში".
შეთანხმებას გამოეხმაურა პალესტინის ლიდერის, მაჰმუდ აბასის სპიკერი, რომლის განცხადებით, გარიგება ღალატია და ის აუცილებლად უნდა შეიცვალოს.
თურქეთის საგარეო საქმეთა სამინისტრომ გამოაქვეყნა განცხადება, რომელშიც ნათქვამია, რომ რეგიონის ხალხის "ისტორია და სინდისი" არ დაივიწყებს და არასოდეს აპატიებს არაბეთის გაერთიანებულ საამიროებს "ფარისევლურ საქციელს", ისრაელთან შეთანხმების გამო.