ევროკომისიის პრეზიდენტი ურსულ ფონ დერ ლაიენი ეხმიანება ბელარუსში მიმდინარე მოვლენებს და აცხადებს, რომ ევროკავშირი აუცილებლად გადახედავს ბელარუსთან ურთიერთობებს. ამის შესახებ ევროკომისიის პრეზიდენტი მიკრობლოგ "ტვიტერზე" წერს.
ურსულა ფონ დერ ლაიენის განცხადებით, ურთიერთობების გადახედვასთან ერთად ევროკავშირი შესაბამის ზომებს მიიღებს ბელარუსში მიმდინარე მოვლენებზე პასუხისმგებელი პირების მიმართ.
"ბელარუსიის საპრეზიდენტო არჩევნები არც თავისუფალი ყოფილა და არც სამართლიანი. სახელმწიფოს მხრიდან ძალადობა და ადამიანის უფლებების, თავისუფლების შელახვა დაუშვებელია. ევროკავშირი ბელარუსთან ურთიერთობის საკითხს გადახედავს და პასუხისმგებელი პირების მიმართ შესაბამის ზომებს მიიღებს", - წერს ურსულა ფონ დერ ლეიენი ტვიტერზე.
ბელარუსის ცენტრალურმა საარჩევნო კომისიამ საპრეზიდენტო არჩევნების წინასწარი შედეგები გამოაქვეყნა, რომლის მიხედვითაც მოქმედმა პრეზიდენტმა, ალექსანდრ ლუკაშენკომ ხმათა 80.23% მიიღო, ხოლო მისმა მთავარმა მოწინააღმდეგემ, სვეტლანა ციხანოუსკაიამ კი - 9.9%
საარჩევნო უბნების დახურვისა და ეგზიტპოლის შედეგების გამოქვეყნებისთანავე, ბელარუსის დედაქალაქი მინსკი და სხვა ქალაქები საპროტესტო ტალღამ მოიცვა. დემონსტრანტები მიიჩნევენ, რომ არჩევნები გაყალბებულია.
ხელისუფლებად დემონსტრანტების წინააღმდეგ რეზინის ტყვიები, ცრემლსადენი გაზი, წყლის ჭავლი და ფიზიკური ძალა გამოიყენა.
ბელარუსის შინაგან საქმეთა სამინისტროს ინფორმაციით, 30-ზე მეტ ქალაქში აქციებზე დაკავებულია დაახლოებით 3000 დემონსტრანტი. შეტაკებების დროს მინსკში ერთი დემონსტრანტი დაიღუპა.
დღეს გავრცელდა ინფორმაცია, რომ ლუკაშენკოს მთავარმა მეტოქემ, სვეტლანა ციხანოვსკაიამ ბელარუსი დატოვა და ლიეტუვაში გაემგზავრა.
სვეტლანა ციხანოვსკაიას ადგილსამყოფელი უცნობი მას შემდეგ გახდა, რაც მან ბელარუსის ცენტრალურ საარჩევნო კომისიაში არჩევნების შედეგები გაასაჩივრა.
ზოგიერთი მედიასაშუალება იუწყებოდა, რომ შესაძლოა ციხანოვსკაიაზე თავდასხმა იგეგმებოდა.
მოგვიანებით, გავრცელდა ვიდეოჩანაწერი, სადაც ციხანოვსკაია თანამოქალაქეებს მიმართავს და მოუწოდებს თავი შეიკავონ საპროტესტო აქციებში მონაწილეობისგან. ვარაუდობენ, რომ ვიდეომიმართვა იძულებით არის ჩაწერილი.