ბელარუსის ოპოზიციონერი საპრეზიდენტო კანდიდატი, სვეტლანა ციხანოვსკაია ქვეყნის დატოვების მიზეზებს განმარტავს. ამის შესახებ ის თავის ვიდეომიმართვაში აცხადებს, რომელიც ცოტა ხნის წინ გავრცელდა.
მისი განცხადებით, ქვეყნის დატოვების შესახებ გადაწყვეტილება დამოუკიდებლად მიიღო და მასზე გავლენა არავის მოუხდენია.
"მე ძალიან რთული გადაწყვეტილება მივიღე. ეს გადაწყვეტილება მივიღე აბსოლუტურად დამოუკიდებლად. არც მეგობრებს, ნათესავებს, საარჩევნო შტაბს და არც სერგეის [ტიხანოვსკაიას ქმარი] ამ გადაწყვეტილებაზე გავლენა არ მოუხდენია", - ამბობს ციხანოვსკაია.
"ვიცი, რომ ბევრი გამიგებს, ბევრი გამაკრიტიკებს, ზოგიერთი კი შემიძულებს, მაგრამ არავის ვუსურვებდი ასეთი არჩევანის წინაშე ყოფნას", - დასძენს ციხანოვსკაია.
"წინასაარჩევნო კამპანიის დროს იმდენად ძლიერ გავხდი, ვფიქრობდი, რომ ყველაფერს გავუძლებდი, მაგრამ ალბათ ისევ სუსტ ქალად დავრჩი", - ამბობს საპრეზიდენტო კანდიდატი.
სვეტლანა ციხანოვსკაიამ მოუწოდა თანამოქალაქეებს, გაუფრთხილდნენ საკუთარ სიცოცხლეს, რადგან ამად არაფერი ღირს.
"ბავშვები ჩვენს ცხოვრებაში ყველაზე მთავარი რამაა", - დასძენს ციხანოვსკაია ვიდეომიმართვაში, რომელსაც "ბავშვებთან წავედი" ჰქვია.
შეგახსენებთ, დღეს გავრცელდა ინფორმაცია, რომ ციხანოვსკაიამ ბელარუსი დატოვა და ლიეტუვაში გაემგზავრა.
სვეტლანა ციხანოვსკაიას ადგილსამყოფელი უცნობი მას შემდეგ გახდა, რაც მან ბელარუსის ცენტრალურ საარჩევნო კომისიაში არჩევნების შედეგები გაასაჩივრა.
ზოგიერთი მედიასაშუალება იუწყებოდა, რომ შესაძლოა ციხანოვსკაიაზე თავდასხმა იგეგმებოდა.
ბელარუსის ცენტრალურმა საარჩევნო კომისიამ საპრეზიდენტო არჩევნების წინასწარი შედეგები გამოაქვეყნა, რომლის მიხედვითაც მოქმედმა პრეზიდენტმა, ალექსანდრ ლუკაშენკომ ხმათა 80.23% მიიღო, ხოლო მისმა მთავარმა მოწინააღმდეგემ, სვეტლანა ციხანოვსკაიამ კი - 9.9%
საარჩევნო უბნების დახურვისა და ეგზიტპოლის შედეგების გამოქვეყნებისთანავე, ბელარუსის დედაქალაქი მინსკი და სხვა ქალაქები საპროტესტო ტალღამ მოიცვა. დემონსტრანტები მიიჩნევენ, რომ არჩევნები გაყალბებულია.
ხელისუფლებად დემონსტრანტების წინააღმდეგ რეზინის ტყვიები, ცრემლსადენი გაზი, წყლის ჭავლი და ფიზიკური ძალა გამოიყენა.
ბელარუსის შინაგან საქმეთა სამინისტროს ინფორმაციით, 30-ზე მეტ ქალაქში აქციებზე დაკავებულია დაახლოებით 3000 დემონსტრანტი. შეტაკებების დროს მინსკში ერთი დემონსტრანტი დაიღუპა.
არჩევნების შედეგებს არ აღიარებს ლუკაშენკოს მთავარი მეტოქე, სვეტლანა ციხანოვსკაია.
