ბელარუსში საპრეზიდენტო არჩევნები მიმდინარეობს. დღეს, კენჭისყრის მთავარი დღეა, რადგან არჩევნებში წინასწარ ხმის მიცემის პროცედურა ჯერ კიდევ 4 აგვისტოს დაიწყო.
საარჩევნო უბნები დილის 08:00 საათზე გაიხსნა. სულ 5 767 საარჩევნო უბანია გახსნილი.
ბელარუსის ცენტრალური საარჩევნო კომისიის ინფორმაციით, წინასწარ ხმის მიცემის უფლებით ამომრჩეველთა [6.8 მლნ ამომრჩეველია] 41.7%-მა ისარგებლა, რაც რეკორდულად მაღალი მაჩვენებელია ბელარუსის საარჩევნო ისტორიაში.
საპრეზიდენტო არჩევნებში, რომელშიც 5 კანდიდატი მონაწილეობს, მთავარ მეტოქეებად ამჟამინდელი პრეზიდენტი, 65 წლის ალექსანდრ ლუკაშენკო და ყოფილი პედაგოგი, ცნობილი ბლოგერისა და ოპოზიციონერი აქტივისტის, სერგეი ციხანოვსკის ცოლი, სვეტლანა ციხანოვსკაია მიიჩნევიან.
ლუკაშენკო თითქმის დარწმუნებულია, რომ ზედიზედ მეექვსედ გაიმარჯვებს საპრეზიდენტო არჩევნებში, მაგრამ შესაძლოა მძლავრი საპროტესტო ტალღის წინაშე აღმოჩნდეს, რადგან ბელარუსელი მოსახლეობა აღშფოთებულია ხელისუფლების პანდემიაზე რეაგირების, ეკონომიკური სტაგნაციის, სოციალური სიდუხჭირისა და ადამიანის უფლებების მდგომარეობის გამო.
მთელი მსოფლიოს ყურადღება მიპყრობილია ბელარუსისკენ, რადგან ყველას თანაბრად აინტერესებს, შეძლებს კი კვლავ გამარჯვების მოპოვებას "ევროპის უკანასკნელ დიქტატორად" წოდებული ლუკაშენკო, თუ ქვეყანა განვითარებისა და დემოკრატიის გზას დაადგება.