საფრანგეთის რესპუბლიკის პრეზიდენტი ემანუელ მაკრონი ხვალ ლიბანის დედაქალაქ ბეირუთს ეწვევა, რათა ხელისუფლებას აფეთქების ზიანის აღმოსაფხვრელად ევროპის დახმარება შესთავაზოს.
როგორც ელისეის სასახლე იტყობინება, ვიზიტის ფარგლებში შეხვედრები გაიმართება ლიბანის პრეზიდენტთან, მიშელ აუნისთან, პრემიერ-მინისტრ ჰასან დიაბთან და სხვა ლიბანელ მაღალჩინოსნებთან.
გუშინ, ბეირუთის პორტში მომხდარი მძლავი აფეთქების გამო, 300 000 ლიბანელი მოქალაქე თავშესაფრის გარეშე დარჩა. დაიღუპა 100 ადამიანი, დაშავდა დაახლოებით 4 000.
სააგენტო AFP ბეირუთის გუბერნატორზე დაყრდნობით იუწყება, რომ მიყენებული ზარალის ღირებულება 3-დან 5 მილიარდ აშშ დოლარამდე მერყეობს.
ლიბანის ეკონომიკისთვის აფეთქებით გამოწვეული შედეგები შესაძლოა კატასტროფული ზიანის მომტანი აღმოჩნდეს, მით უფრო, რომ ის ისედაც განიცდიდა ეკონომიკურ ვარდნას, რასაც თან ერთვოდა კორონავირუსის პანდემიით გამოწვეული ფინანსური პრობლემები.
საფრანგეთიდან უკვე სამი თვითმფრინავი გაეშურა ლიბანისკენ, რომელთაც 25 ტონა სამედიცინო და ჰუმანიტარული დანიშნულების ტვირთი გადააქვთ.
ლიბანელი ხალხისადმი მხარდაჭერისა და სოლიდარობის ნიშნად, პარიზში ეიფელის კოშკის განათებას გამორთავენ.
ამავდროულად, მხარდაჭერის აღმოსაჩენად მზაობა გამოთქვა ევროკავშირმა, რომელიც წევრ სახელმწიფოებთან კოორდინირებით ლიბანს დახმარების პაკეტს შესთავაზებს.