"ნაციონალურ მოძრაობას" ყველაფრის ფასად, სურს, დაბრუნდეს ხელისუფლებაში. მათ გამოიგონეს ვითომ პოლიტიკურ პარტიებად დაშლის ფენომენი, ვითომ გამოიკვეთნენ ისინი, ვინც არიან მართლები და ამბობენ, რომ იყო შეცდომები, მაგრამ რეფორმები გაატარეს, - ამის შესახებ იუსტიციის მინისტრმა, თეა წულუკიანმა ტელეკომპანია "იმედის" ეთერში ისაუბრა.
მისი თქმით, არ არსებობს ნაციონალური მოძრაობის მიერ არც ერთი წამოწყება, რომელსაც შეიძლება დაარქვა რეფორმა, რომელიც მათ გაატარეს.
"ეს გადაცემა არ ეყოფა იმის ანალიზს, თუ რა გააკეთეს მათ, რითაც თავს იწონებენ.ხშირადაა საუბარი პატრულზე, იუსტიციის სახლებზე... ეს ყველაფერი იყო ზედაპირული წამოწყებები და ამას არანაირი სერიოზულობის კვალი არ ჰქონდა. მათ არ გაუტარებიათ არც ერთი ძირეული საკანონმდებლო რეფორმა. ისინი ნიჩბით ყრიდნენ ბავშვებს ციხეში. როდესაც ხელისუფლება არ ზრუნავს ბავშვზე და მას იმეტებს ციხისთვის, რა თქმა უნდა არ უნდა გაგვიკვირდეს, რომ ეს ხელისუფლება საკნის ფანჯარაში კალაშნიკოვს შეყოფს და პატიმრებს ამოხოცავს. ამაზე რამდენიმე კვირის წინ სტრასბურგის სასამართლომ დარღვევის გადაწყვეტილებაც დაადგინა", - განაცხადა თეა წულუკიანმა.