ოპოზიცია ქმნის დღის წესრიგს, თითქოს ამ ქვეყანაში ყველაფერი ერთი ღერძის, საარჩევნო სისტემის გარშემო ბრუნავს, - განაცხადა ადამიანის უფლებათა კომიტეტის თავმჯდომარემ, სოფო კილაძემ ოპოზიციის საპროტესტო აქციასთან დაკავშირებით, რომელიც პარლამენტის შენობასთან მიმდინარეობს.
მისი თქმით, სხდომაზე არჩევნებზე საუბარი არ ყოფილა, ისაუბრეს ბავშვთა უფლებების კოდექსის იმპლემენტაციაზე.
"ვისაუბრეთ ბავშვთა უფლებების კოდექსის იმპლემენტაციაზე, რომელიც უმნიშვნელოვანესია და ჩვენ 2020-ის 1-ლი ივნისისთვის უნდა მოვასწროთ ყველა იმ ნაბიჯის გადადგმა, რომელიც უზრუნველყოფს გამართული სისტემის მუშაობას.
კიდევ უამრავი თემა, რაზეც ჩემმა კოლეგებმაც ისაუბრეს, უბრალოდ მე ადრე მომიწია გამოსვლა, შეხვედრა მაქვს. ძალიან სამწუხაროა, რომ ოპოზიცია ქმნის დღის წესრიგს, თითქოს ამ ქვეყანაში ყველაფერი ერთი ღერძის, საარჩევნო სისტემის გარშემო ბრუნავს. მე გამოვედი ცოტა ადრე, არ ყოფილა საუბარი არჩევნებზე, გითხარით, რომ საუბარი იყო უმნიშვნელოვანეს თემებზე", - თქვა კილაძემ.
პარლამენტის შენობის შესასვლელებთან ოპოზიციის ლიდერები და მათი მხარდამჭერები აქციას მართავენ. ოპოზიციური პარტიების წარმომადგენლებმა სირცხვილის დერეფნები მოაწყვეს. აქციაზე მიიტანეს ბანერები, რომელზეც არის წარწერა - "სირცხვილია".
ოპოზიციურ პარტიებთან ერთად პარლამენტის წინ იმყოფებიან სამოქალაქო აქტივისტებიც. აქციის მოთხოვნაა, შესრულდეს ბიძინა ივანიშვილის მიერ 24 ივნისს გაცემული დაპირება და 2020 წლის საპარლამენტო არჩევნები პროპორციული წესით ჩატარდეს.
