ხელისუფლება, რომელიც მოვიდა პატარა ბარბარე რაფალიანცის მკვლელობით, აგრძელებს ბავშვების ხოცვას, - ასე ეხმიანება საქართველოს მესამე პრეზიდენტი მიხეილ სააკაშვილი ბაღდათში დატრიალებულ ტრაგედიას.
"ბაღდათის ტრაგედიასთან დაკავშირებით. იმ პირობებში, როდესაც ოლიგარქი ხარჯავს ათობით მილიონ ლარს მხოლოდ თავისი ხეების გადატანა-გადარგვაზე და ამ ხეებისთვის გზების გაკეთებაზე, იმ პირობებში, როდესაც მან 100 მილიონ ლარზე მეტი მარტო გასულ წელს თავის ბინძურ პროპაგანდაზე ტელევიზიებზე, "ფეისბუკ ბოტებზე" ტყუილების გასავრცელებლად დახარჯა, მათ ვერ იპოვეს რამდენიმე ასეული ლარი ამ გაუბედურებული ოჯახის დასახმარებლად და სიცოცხლის გადასარჩენად.
ასეთი ოჯახები სულ უფრო ბევრია იმიტომ რომ როდესაც მთავარი ხელისუფალი არის მთავარი ქურდი და აღარ რჩება სახსრები ჩვეულებრივი ხალხისთვის.
გაეროს მონაცემებით, ჩემი პრეზიდენტობის დროს საქართველოში სიღარიბე შემცირდა მინიმუმ ორჯერ, ხოლო იუნისეფის მონაცემებით, საქართველოში ბავშვთა სიკვდილიანობა შემცირდა სამჯერ. მერე ამათ დავუტოვეთ რამდენიმე მილიარდი ლარი, რომ მოეხმარებინათ ხალხისთვის.
ამის მაგივრად ყველაფერი წაიღეს სახლში და აგრძელებენ საქართველოს ძარცვას. ქართული ოცნების პირობებში სიღარიბე გაიზარდა ისევ მინიმუმ ორჯერ და მოიმატა ბავშვთა სიკვდილიანობამ. ეს საერთაშორისო ორგანიზაციების ფაქტებია.
საქართველოში უნდა გათენდეს, წინააღმდეგ შემთხვევაში ჩვენ ვერ გავექცევით ახალ ტრაგედიებს. ხელისუფლება, რომელიც მოვიდა პატარა ბარბარე რაფალიანცის მკვლელობით, აგრძელებს ბავშვების ხოცვას. ამას ყველაფერს ძალიან მალე დაესმება წერტილი", - განაცხადა მიხეილ სააკაშვილმა.
