მალხაზ მაჩალიკაშვილი სოციალურ ქსელში წერს, რომ პარლამენტის წინ ატრაქციონები არა ბავშვების ინტერესებისთვის, არამედ მასზე შურისძიების გამო დადგეს.
"“პირველ რიგში, გილოცავთ დამდეგ 2020 წელს. მე მალხაზ (ვახა) მაჩალიკაშვილს, განსხვავებით ქოცური თანამდეობის პირებისა, ბავშვები ძალიან მიყვარს და მათი გულისთვის ვიბრძვი.
ვიცი, თემირლანს არავინ და ვერავინ დამიბრუნებს, მაგრამ ამ გაუსაძლის პირობებში, როგორც დაჭრილი, კუთხეში მიმწყვდეული მხეცი, მაინც ვცდილობ თქვენი შვილებისთვის ვიბრძოლო, რომ ისინი უსაფრთხოდ იყვნენ საწოლში მძინარეც და გარეთ ქუჩებშიც.
ჩემი თხოვნა იქნება, თბილისი დიდია, არის სახალწლო სოფელიც… ნუ გამოიყვანთ პარლამენტის წინ თქვენს შვილებს, იქ მესამე ახალწელს ქუჩაში იმის მოთხოვნით ვდგავარ, რომ მითხრან, თემირლანის მკვლელი ვინ არის.
არა არის იქ ბავშვებისთვის საზეიმო ადგილი, ამ ყველაფერს დღევანდელი სისხლიანი ხელისუფლება ბავშვების ინტერესების გამო არ აკეთებს, ისინი ჩემზე შურისძიებას ცდილობენ. არ აქვთ ამათ ბავშვების დარდი. დიდი პატივისცემით მალხაზ (ვახა) მაჩალიკაშვილი", - წერს მაჩალიკაშვილი.
შეგახსენებთ, ცოტა ხნის წინ, ქალაქ თბილისის მერიის დასუფთავების სამსახურმა პარლამენტის წინ მიმდებარე ტერიტორიიდან კარვებისგან გაათავისუფლა.
ამის შემდეგ, პარლამენტის წინ, ატრაქციონები და გასაბერი ბატუტი დადგეს.
პარლამენტის წინ გაშლილი იყო თემირლან მაჩალიკაშვილის მამის, მალხაზ მაჩალიკაშვილის, დეკანოზ გიორგი მამალაძის ძმის, თორნიკე მამალაძისა და მოძრაობა „სირცხვილიას“ კარვები და ბანერები.
ადგილზე იმყოფებოდნენ სამოქალაქო აქტივისტები, რომლებიც წინააღმდეგობას უწევდნენ დასუფთავების სამსახურს, რომელსაც ტერიტორიიდან კარვები და სხვა ნივთები გაჰქონდა.
პოლიციამ პარლამენტის შენობის წინ ცხრა პირი დააკავა, მათ შორის ზუკა ბერძენიშვილი და ბექა ბასილაია.
