15 მაისს, საქართველოში პროდუქტ დიზაინის, როგორც სამრეწველო დიზაინის ერთ-ერთი მიმართულების ცნობადობის გაზრდისა და პოპულარიზაციის მიზნით, Tbilisi Art Fair (TAF 2019)-ის ფარგლებში, საგალერეო დიზაინ-ობიექტების გამოფენა იხსნება, რომელიც თანამედროვე ხელოვნების მუზეუმში 19 მაისამდე გასტანს.
გამოფენა „დიზაინ ჯორჯია“-ს ბრენდის ქვეშ წარიმართება და მისი მხარდამჭერებია ეკონომიკისა და მდგრადი განვითარების სამინისტროს სააგენტო „აწარმოე საქართველოში“, ევროკავშირისა და გერმანიის მთავრობის დაფინანსებით მიმდინარე პროექტი, რომელსაც GIZ-ი (გერმანიის საერთაშორისო თანამშრომლობის საზოგადოება) ახორციელებს და ქართული ავეჯის კლასტერი.
აღნიშნული გამოფენის TAF-ის ფარგლებში მოწყობა ქართული საგალერეო და საკოლექციო დიზაინ-ობიექტების წარმოჩენის საუკეთესო საშუალებას იძლევა. თანამედროვე ხელოვნების ეს საერთაშორისო ბაზრობა დამწყებ სახელოვნებო სცენებზეა ფოკუსირებული. ის თავს უყრის კოლექციონერებს, კურატორებს, ხელოვნების პროფესიონალებს მსოფლიოს სხვადასხვა ქვეყნიდან და აცნობს მათ შავ, კასპიისა და ბალტიის ზღვების რეგიონებში მოღვაწე ხელოვანებსა და გალერეებს.
პროდუქტ დიზაინი საქართველოში მსოფლიო ტენდენციების შესაბამისად ვითარდება, თუმცა აუცილებელია ქვეყანაში დარგის ცნობადობის გაზრდა, პოპულარიზაცია, სახელოვნებო საზოგადოების მიერ ქართული პროდუქტ დიზაინის ხელოვნების დარგად აღიარება.
გამოფენაში მონაწილეობენ როგორც ქართული ავეჯის კლასტერში გაერთიანებული ოთხი დიზაინ-სტუდია, ისე სპეციალურად ამ გამოფენისთვის კონკურსის გზით შერჩეული მონაწილეები. კონკურსი სააგენტოს „აწარმოე საქართველოში“ თაოსნობითა და ქართული ავეჯის კლასტერის ჩართულობით მოეწყო და აპლიკანტების მიერ წარმოდგენილი ნამუშევრები ამ სფეროში მოღვაწე ადგილობრივი და საერთაშორისო ექსპერტებით დაკომპლექტებულმა სპეციალურმა ჟიურიმ შეაფასა.
„დიზაინ ჯორჯია“-ს ბრენდის ქვეშ წარმოდგენილი დიზაინისა და თანამედროვე ხელოვნების სინთეზით შექმნილი ავეჯი, განათება და ინტერიერის აქსესუარები დამთვალიერებელს ხელოვნებისა და თანამედროვე ტექნოლოგიების კავშირის დანახვის შასაძლებლობას მისცემს.
