დაპირისპირების საფუძველს ვეღარ ვხედავ, ვინაიდან სამართლიანობა ჩამოიქცა, - განაცხადა ტელეკომპანია “პირველის“ ეთერში პოეტმა დავით მაღრაძემ. მან გადაცემაში მოძრაობა „დაიცავი საქართველოს“ აღდგენის მიზეზების შესახებ ისაუბრა.
„როდესაც ახალმა ხელისუფლებამ ზნეობრივი არჩევანი გააკეთა იმათ სასარგებლოდ, რასაც ჩვენ ვუპირისპირდებოდით, ამის მერე შინაარსი დაკარგა ჩემთვის ამ დაპირისპირებამ, ჩამოიცალა შინაარსისაგან ძველი ხელისუფლებისა და ახალი ხელისუფლების დაპირისპირება. ვეღარ ვხედავ მე იმ საფუძველს, მათ შორის შინაარსს, დაპირისპირების საფუძველს ვეღარ ვხედავ, ვინაიდან სამართლიანობა ჩამოიქცა“, - განაცხადა მაღრაძემ და აღნიშნა, რომ ის ძველი აღმოსავლური ტიპის დესპოტიის შექმნის მცდელობა ეყრდნობოდა სწორედ იმ ბურჯებს, სადაც დღევანდელი მოსამართლეების ძებნა დაიწყო ახალმა ხელისუფლებამ. ესენი იყვნენ უსამართლობის ბურჯები.
„ეს ხალხი ქმნიდა იმ სვეტს, რომელზეც ძველი ხელისუფლება აშენდებდა უსამართლო სახელმწიფოს. ზუსტად იმ სვეტზე გადაწყვიტა ახალმა ხელისუფლებამ ააშენოს ახალი სამართალი. მაპატიეთ, ეს რა შემთხვევაა იცით? სასტიკი შედარებისგან თავს შევიკავებ, თვალსაჩინოებისათვის ვიტყვი: ქრისტე, როდესაც თავის მოძღვრებას აშენებდა, პეტრე მოციქულზე აშენებდა. იუდაზე ქრისტიანობა არ შენდება. ჩემთვის, ეს არის ამ ხელისუფლების საბედისწერო შეცდომა. ამდენად, ვთვლი რომ შინაარსი დაკარგა ამ დაპირსიპირებამ, რომლის ზღვარი სამართლიანობასა და უსამართლობას შორის გადიოდა“, - განაცხადა მაღრაძემ.
