რეგულატორის მიერ მიღებული გადაწყვეტილების პარლამენტის კომიტეტზე განხილვა და კითხვის ნიშნის ქვეშ დასმა, რეგულატორის დამოუკიდებლობაზე იერიშის მიტანა,- ამის შესახებ საქართველოს პარლამენტის დარგობრივი ეკონომიკისა და ეკონომიკური პოლიტიკის კომიტეტის სხდომაზე ეროვნული ბანკის პრეზიდენტმა, კობა გვენეტაძემ განაცხადა.
“თიბისი ბანკთან“, რომლის რეგულატორი ვართ, ისევე როგორც სხვა ბანკებისა, ჩვენ გავაკეთეთ ერთობლივი განცხადება, სადაც ძალიან მკაფიოდ არის აღნიშნული, რომ „თიბისი ბანკს“ და ეროვნულ ბანკს შორის „თიბისი ბანკის“ მხრიდან დავები არ არსებობს. როდესაც ამ თემაზე დაიწყო საუბარი, ჩემს თავზე ავიღე ის რისკი, რაც შეიძლება ჩემი რეპუტაციისთვის შეიძლება ზიანი მიეყენებინა, რადგან პირველ რიგში, ვზრუნავ ბანკზე, ფინანსურ სექტორზე. სანამ არ გაკეთდა ერთობლივი განცხადება თიბისის და ეროვნული ბანკისა, ამასთან დაკავშირებით, სხვა ინფორმაცია არ მოგვიცია. ამის შემდეგ დამატებითი ინფორმაცია, რომელიც ამ საკითხთან იყო, საკმაოდ ნათელი და დეტალური მივეცით. ასეთ სიტუაციაში რეგულატორის მიერ მიღებული გადაწყვეტილების ასე განხილვა და კითხვის ნიშნის ქვეშ დასმა, ეს არის რეგულატორის დამოუკიდებლობაზე იერიშის მიტანა. ეს არის გავლენის მოხდენის მცდელობა“,- განაცხადა კობა გვენეტაძემ.
საქართველოს პარლამენტში დარგობრივი ეკონომიკისა და ეკონომიკური პოლიტიკის კომიტეტის სხდომა მიმდინარეობს, რომელსაც „თიბისი ბანკის“ დამფუძნებელები მამუკა ხაზარაძე და ბადრი ჯაფარიძეც ესწრებიან.
