ტურიზმის ეროვნულმა ადმინისტრაციამ, კერძო სექტორის წარმომადგენლებთან შეხვედრისას, ქვეყანაში სანიტარული კვანძების მოწესრიგებას დაანონსა.
შეხვედრაზე, კერძო სექტორის წარმომადგენლებმა ტურიზმის ეროვნული ადმინისტრაციის წინადადება მოიწონეს.
როგორც ტურიზმის ადმინისტრაციის ხელმძღვანელი მარიამ ქვრივიშვილი განმარტავს, ადმინისტრაცია ინფრასტრუქტურისა და ეკონომიკის სამინისტროებთან აღნიშნული პრობლემის მოგვარებისთვის აქტიურად იმუშავებს.
"არ შეიძლება ვამბობდეთ, რომ მაღალმხარჯველი ტურისტი გვინდა და თბილისიდან ყაზბეგამდე ელემენტარულად მოწესრიგებულ ინფრასტრუქტურას ვერ ვხედავდეთ", - განაცხადა ქვრივიშვილმა.
ტურიზმის ეროვნული ადმინისტრაციის ხელმძღვანელი ამბობს, რომ საწყის ეტაპზე უკვე შერჩეულია 70 მიმართულება სადაც სანიტარული ინფრასტრუქტურა მოწესრიგდება.
შეგახსენებთ, რომ ტურიზმის ეროვნული ადმინისტრაციის ხელმძღვანელი მარიამ ქვრივიშვილი ტურიზმის სექტორის წარმომადგენლებთან გაფართოებულ ფორმატში შეხვედრას მართავს, სადაც ის ადმინისტრაციის სამომავლო გეგმებს წარადგენს.
