თითქოს ჩვენი ასოციაცია პროგნოზირებს პურის გაძვირებას საქართველოში, რაც არის გაუგებრობა და არ შეესაბამება სინამდვილეს, - ამის შესახებ ნათქვამია საქართველოს ხორბლისა ფქვილის მწარმოებელთა ასოციაციის მიერ გავრცელებულ განცხადებაში.
განცხადებაში ასოციაცია აღნიშნავს, რომ ასოციაცია მოქმედებს კომპეტენციის ფარგლებში და აქედან გამომდინარე განცხადებებს აკეთებს მხოლოდ ხორბლის და ფქვილის ბაზრებზე მიმდინარე პროცესებზე.
„ბოლო დღეებში ზოგიერთი სატელევიზიო და საინფორმაციო საშუალებით გავრცელდა ინფორმაცია, თითქოს ჩვენი ასოციაცია პროგნოზირებს პურის გაძვირებას საქართველოში, რაც არის გაუგებრობა და არ შეესაბამება სინამდვილეს.
გვინდა განვაცხადოთ, რომ ჩვენი ასოციაცია მოქმედებს მისი კომპეტენციის ფარგლებში და აქედან გამომდინარე განცხადებებს აკეთებს მხოლოდ ხორბლის და ფქვილის ბაზრებზე მიმდინარე პროცესებზე.
ვადატურებთ, რომ მსოფლიო ბაზრებიდან გამომდინარე საქართველოში იმპორტირებული ხორბლის ფასები საგრძნობლად გაზრდილია.აქედან გამომდინარე ყველაფერს ვაკეთებთ, რომ აღნიშნული გარემოება ფქვილის ფასზე დრამატულად არ აისახოს (ფქვილის წარმოებაში ხორბლის წილი 80%-ია) და ამ მხრივ რისკები იყოს მინიმალიზირებული.
რაც შეეხება პურის ფასს, ეს საკითხი არის მხოლოდ ჩვენი კოლეგების პურის მწარმოებლების საკითხი, ვუდასტურებთ მათ ჩვენს პატივისცემას და არ ვიჭრებით მათ კომპეტენციაში .
ასევე გვინდა აღვნიშნოთ, რომ თუ ჩვენი ასოციაციის მიერ სატელევიზიო და საინფორმაციო საშუალებებისათვის მიცემული რომელიმე კომენტარი იძლევა ინტერპრეტირების საშუალებას და გამომდინარე აქედან რაიმე ფორმით ოდნავ მაინც რჩება შთაბეჭდილება, რომ ჩვენ ვპროგნოზირებთ პურის გაძვირებას, კიდევ ერთხელ ვაცხადებთ, რომ ეს ასე არ არის.
ასევე ვუდასტურებთ ჩვენს პატივისცემას ტელევიზიებს და საინფორმაციო საშუალებებს და ყოველთვის მზად ვართ აქტიური თანამშრომლობისათვის”, აღნიშნულია საქართველოს ხორბლისა ფქვილის მწარმოებელთა ასოციაციის მიერ გავრცელებულ განცხადებაში.
