,,ტყის მდგრადი მართვა სოფლის განვითარებისათვის" პროექტის ფარგლებში შეხვედრა გაიმართა. პროექტს, გარემოს დაცვისა და სოფლის მეურნეობის სამინისტროსთან თანამშრომლობით, კავკასიის გარემოსდაცვითი არასამთავრობო ორგანიზაციების ქსელი CENN, ავსტრიის განვითარების სააგენტოს (ADC) ფინანსური მხარდაჭერით ახორციელებს.
პრეზენტაციაზე აჭარის მთავრობის თავმჯდომარემ პროექტის მნიშვნელობაზე ისაუბრა - ,,ტყის სისტემური და მდგრადი მართვა მნიშვნელოვანია აჭარისთვის, განსაკუთრებით კი მუნიციპალიტეტებისთვის. ტყის სექტორის განვითარება ქვეყნის პრიორიტეტულ მიმართულებას წარმოადგენს და დარწმუნებული ვარ, პროგრამის წარმატებით განხორციელების შემთხვევაში ჩვენ გვექნება წინ გადადგმული ნაბიჯი ტყის რესურსების უკეთ გამოყენების თვალსაზრისით.''
დღესვე, აჭარის სოფლის მეურნეობის სამინისტროსა და CENN-ს შორის მემორანდუმი გაფორმდა, რომელიც გულისხმობს ორმხრივ თანამშრომლობას სოფლის განვითარების უწყებათაშორისი საბჭოს საქმიანობის ფოკუსირებისთვის სატყეო დარგზე, როგორც სოფლის განვითარების მნიშვნელოვან კომპონენტზე.
პროექტი მიზნად ისახავს ადგილობრივი შემოსავლის წყაროების დივერსიფიკაციის ხელშემწყობი გარემოს შექმნას და ეკოლოგიური რისკების შემცირებას ტყის მართვის გაუმჯობესების, სოფლად მდგრადი ენერგეტიკული გადაწყვეტილებების, ბუნებრივი კატასტროფების შემცირების, განათლების, ცნობიერების ამაღლების, ქალთა დასაქმების შესაძლებლობების გაზრდისა და ამ საკითხებზე ეფექტიანი უწყებათაშორისი კოორდინაციის ხელშეწყობის გზით.
შეხვედრას აჭარის სოფლის მეურნეობის მინისტრი ტიტე აროშიძე, სამთავრობო უწყების, უმაღლესი საბჭოს და ადგილობრივი თვითმმართველობების წარმომადგენლები, ასევე, სავაჭრო-სამრეწველო პალატის წევრები ესწრებოდნენ.
